Frantsııada Salvador Dalı jasaǵan qola muqaba urlandy
ASTANA. KAZINFORM – 4 qazannan 5 qazanǵa qaraǵan túni Frantsııanyń Overn óńiri, Pıýı-de-Dom departamentindegi Issýar kommýnasynda ornalasqan Zamanaýı óner ortalyǵynan Salvador Dalı jasaǵan «Áýlıe Ioannnyń apokalıpsısi» kitabynyń qola muqabasy urlandy, dep habarlaıdy Kazinform agenttiginiń menshikti tilshisi.
Vedomstvo urlanǵan zatty asa qundy, aıryqsha ári biregeı óner týyndysy retinde baǵalady. Іsti Klermon-Ferran jandarmerııasynyń tergeý bólimi qaraıdy. Sarapshylardyń baǵalaýynsha, sırek jádigerdiń quny 300 myń eýrodan asady.
Le Parisien basylymynyń málimetinshe, jádigerdiń joǵalǵanyn onyń ıesi dúısenbi kúni tańerteń baıqaǵan. Tekserý barysynda qala shetindegi ǵımarattyń úlken qaqpasyn buzyp kirgeni anyqtaldy. Salmaǵy shamamen 150 keli bolatyn zatty urylardyń qalaı alyp ketkeni ázirge belgisiz, polıtsııa osy jaıtty anyqtap jatyr.
Áńgime 1958-1961 jyldary Overn óńirindegi óner baspageri Jozef Fordyń bastamasymen, Ioann Bogoslovtyń «Aıan» kitaby jelisi boıynsha jasalǵan, álemde jalǵyz danasy bar biregeı týyndynyń muqabasy týraly bolyp otyr. Kitaptyń jalpy salmaǵy shamamen 210 keli. Onyń qola muqabasyn Salvador Dalı jasap, ony altynmen, asyl tastarmen jáne teńiz qabyrshaqtarymen bezendirgen. Muqabanyń salmaǵy shamamen 150 keli. Kitaptyń ishinde qolmen jazylǵan kallıgrafııalyq mátinder men túrli ıllıýstratsııalar beınelengen 150-ge jýyq iri pergament paraǵy bar.
Bul biregeı týyndyny jasaýǵa HH ǵasyrdyń jeti sýretshisi men jeti jazýshysy atsalysqan. Olardyń qatarynda Salvador Dalı, Leonar Fýjıta, Bernar Bıýffe, Jorj Mate, Osıp Tsadkın, Leonor Fını, Per-Iv Tremýa, sondaı-aq Jan Kokto, Jan Jıono jáne Emıl Choran bar. TF1 málimetinshe, kitaptyń paraqtaryn tolyq jaıyp qoıǵanda, olardyń jalpy uzyndyǵy shamamen 150 metrge jetedi. Al qoljazba mátininde 95 myńǵa jýyq tańba bar.
1961-1972 jyldary kitap 150-ge jýyq kórmege qoıylǵannan keıin Shveıtsarııada saqtalǵan. Keıin ony japondyq ıeleri satyp alyp, kitapty bólshektep satýdy josparlaǵan. 2003 jyly eńbekti óner týyndylaryn qalpyna keltirýmen aınalysatyn kompanııanyń basshysy ári Issýardaǵy ortalyqtyń negizin qalaýshy Krıstıan Karýttsos satyp alǵan. Ol kitapty qansha qarjyǵa alǵanyn jarııalamaǵan.
Krıstıan Karýttsostyń AFP agenttigine aıtýynsha, kitap jasalǵan kezde onyń quny 2 mln eski frankke baǵalanǵan. Bul qazirgi baǵamen shamamen 305 myń eýroǵa teń. Sol kezde bul týyndy álemdegi eń qymbat kitap sanalǵan. Qazir onyń muqabasynyń quny birneshe mıllıon eýroǵa baǵalanyp otyr.
– Ótken túni Frantsııaǵa, frantsýzdyń mádenı murasyna aýyr soqqy jasaldy, – dedi Karýttsos jergilikti radıoǵa bergen suhbatynda.
Issýar meri Bertran Barro muny orny tolmas qasiret dep atap, kitapty ólsheýsiz eńbek dep baǵalady.
Le Figaro basylymy naqtylaǵandaı, urlyq bolǵan kezde ortalyqta kitaptyń muqabasy ǵana kórmege qoıylǵan. Kórme qazan aıynyń sońyna deıin jalǵasatyn edi. Al pergament paraqtary bólek jerde saqtalǵan.
Aqzat Jıenalına
