Frantsııada polıtsııa adamdardy pyshaqpen qorqytqan er adamǵa oq atty

ASTANA. KAZINFORM — 22 jeltoqsan kúni Frantsııanyń Grenobl qalasynda polıtsııa pyshaqpen adamdarǵa qaýip tóndirgen er adamǵa qarsy oq atty, dep habarlaıdy agenttiktiń menshikti tilshisi.

Aldyn ala málimetke sáıkes, tańǵy saǵat 09:00 shamasynda er adam avtooqytý ortalyǵynyń ǵımaratyna basyp kirip, qyzmetkerlerdi pyshaqpen qorqytqan. Oqıǵa týraly habar túsken soń, polıtsııa qyzmetkerleri shaqyrylǵan.

Kúdikti oqıǵa ornynan qashyp úlgergenimen, kóp uzamaı jaqyn mańdaǵy kóshelerdiń birinen tabylǵan. Polıtsııa ony ustaý kezinde er adam avtokóligin tártip saqshylaryna qaraı baǵyttaǵan. Osyǵan baılanysty polıtsııa qyzmetkerleri qarý qoldanýǵa májbúr bolǵan.

Nátıjesinde kúdikti jaraqat aldy. Dárigerler onyń ómirine qaýip tónip turmaǵanyn habarlady. Er adamnyń jeke basy polıtsııaǵa belgili.

Buǵan deıin AQSh polıtsııasy Braýn ýnıversıtetindegi shabýylǵa qatysy bar kúdiktini anyqtaǵany habarlanǵan edi.