Frantsııada Pıkasso kartınasy lotereıa arqyly oınatylady
ASTANA. KAZINFORM — Frantsııadaǵy qaıyrymdylyq lotereıasy Pıkassonyń kartınasyn 100 eýroǵa utyp alý múmkindigin usynady. Túsken qarjy Altsgeımer aýrýyn zertteýge jumsalady.
Pablo Pıkasso kartınalarynyń biri Frantsııada qaıyrymdylyq lotereıasy arqyly oınatylmaq.
Lotereıa 14 sáýirde Christie’s aýktsıon úıinde ótedi. Oıynǵa qoıylǵan týyndy — «Tête de Femme» («Áıel júzi»). Kartına 1941 jyly salynǵan.
Mundaı aktsııa alǵash ret uıymdastyrylyp otyrǵan joq. 2013 jyly «100 eýroǵa 1 Pıkasso» jobasy kezinde AQSh-tan kelgen órt sóndirýshi «Opera shlıapasyn kıgen adam» (1914) kartınasyn utyp alǵan. 2020 jyly osyndaı lotereıany Italııa turǵyny jeńip, Rojdestvoǵa Pıkassonyń natıýrmorttyn ıelengen.
Kollektsıoner Devıd Nahmadtyń aıtýynsha, bul bastamany sýretshiniń ózi de qoldar edi, sebebi Pablo Pıkasso kózi tirisinde týyndylaryn jıi syıǵa berip, ónerdi keń aýdıtorııaǵa qoljetimdi etýdi qalaǵan.
Bul aktsııany uıymdastyrýshy — Altsgeımer aýrýyn zertteıtin qor. Parıjdegi iri memlekettik aýrýhanalardyń birinde jumys isteıtin qor 2004 jyldan beri Frantsııadaǵy osy baǵyttaǵy eń iri jeke ǵylymı ınvestorǵa aınalǵan.
Oıynda barlyǵy 120 myńǵa deıin bılet satylyp, 12 mln eýroǵa deıin qarajat jınalýy múmkin. Túsimniń shamamen 1 mln eýrosy týyndy ıesi Opera Gallery-ge beriledi.
Buǵan deıingi osyndaı eki aktsııada 10 mln eýrodan astam qarajat jınap, Lıvan men Afrıka elderindegi mádenı jáne gýmanıtarlyq jobalarǵa baǵyttalǵan.
Eske salaıyq, byltyr jeltoqsan aıynda Parıjdegi Christie’s dúkeninde Pıkassonyń osy týyndysy satylymǵa qoıylǵany habarlanǵan bolatyn. Kartına shamamen bir mıllıon eýroǵa baǵalandy.
