Frantsııada ormandy qasaqana órtedi degen kúdikpen 32 adam ustaldy
ASTANA. KAZINFORM – Frantsııada orman órtin qasaqana tutatty degen kúdikpen 32 adam ustaldy. Eldiń birneshe óńirinde aptap ystyq saqtalyp, orman órtteri áli de jalǵasyp jatyr. Bul týraly Anadolý agenttigi jazdy.
Frantsııanyń Іshki ister mınıstri Loran Nýnes Ulttyq jandarmerııa orman órtterin sóndirý jumystaryna jumyldyrylǵanyn málimdedi. Onyń aıtýynsha, 22 departamentte ormanǵa qasaqana órt qoıǵan degen kúdikpen 32 adam ustalǵan.
– Órttiń qaıǵyly saldaryna ákelip, órt sóndirýshilerdiń ómirine qaýip tóndirgen bul áreketter úshin endi sot aldynda jaýap beredi, – dedi mınıstr.
Meteo-France agenttiginiń málimetinshe, aptap ystyqqa baılanysty 24 departamentte eń joǵary – «qyzyl», al 59 departamentte «qyzǵylt sary» qaýip deńgeıi jarııalanǵan. Keı óńirlerde aýa temperatýrasy 39 gradýsqa deıin kóteriledi dep boljanyp otyr.
Frantsııa órt sóndirýshiler federatsııasynyń tóraǵasy Jan-Pol Boslandtyń aıtýynsha, elde qazir shamamen 20 orman órti áli de sóndirilmegen. Ol turǵyndardy órt qaýipsizdigi erejelerin qatań saqtaýǵa shaqyryp, eń kishkentaı ushqynnyń ózi iri órtke sebep bolýy múmkin ekenin eskertti.
Jaz bastalǵaly Frantsııa úshinshi ret aptap ystyqqa tap boldy. Soǵan baılanysty Parıjdi qosa alǵanda birqatar qalada keıbir sporttyq jáne mádenı is-sharalar toqtatyldy.
Sonymen qatar eldiń Sport mınıstri Marına Ferrarı 19 maýsymnan beri Frantsııada sýǵa ketip 131 adamnyń qaza tapqanyn málimdedi. Onyń aıtýynsha, qaıǵyly oqıǵalardyń 55 paıyzy sýǵa túsýge tyıym salynǵan jáne baqylaýsyz oryndarda bolǵan.
Osyǵan baılanysty mınıstr turǵyndardy saq bolýǵa shaqyrdy.
19 shildede Frantsııa úkimeti alǵash ret aptap ystyqqa baılanysty ORSEC tótenshe sharalar josparyn iske qosty. Jospar aıasynda qarttar men úısiz adamdar sııaqty osal toptardy qorǵaý jáne olardy qaýipsiz oryndarǵa ornalastyrý kózdelgen.
Eske sala ketsek, aptap ystyqtan Frantsııadaǵy týrıstik nysandardyń jumys ýaqyty qysqardy.
