Frantsııada orman órtteriniń beti qaıtty
ASTANA. KAZINFORM — Frantsııada birneshe kúnge sozylǵan kúresten keıin orman órtteri baqylaýǵa alyndy, dep habarlaıdy Kazinform agenttigi TASS-qa silteme jasap.
Frantsııanyń premer-mınıstri Sebasten Lekornıý el aýmaǵyndaǵy orman órtteri qazirgi ýaqytta baqylaýǵa alynǵanyn málimdedi.
— Jalpy alǵanda, búginde elimizdegi orman órtteri baqylaýǵa alyndy, — dedi Úkimet basshysy La Tribune Dimanche gazetine bergen suhbatynda.
Onyń aıtýynsha, Frantsııanyń ońtústik-batysyndaǵy Jıronda departamentinde shyqqan órtpen kúres qıyn bolǵan. Sebebi jalyn óz aýa aǵyndaryn qalyptastyryp, baǵytyn kútpegen jerden ózgertip, tez taralǵan.
— Qazirgi ýaqytta tótenshe jaǵdaılar qyzmetteriniń janqııarlyq eńbeginiń, aýa raıynyń ózgerýiniń jáne órt oshaqtaryn úzdiksiz baqylaýdyń arqasynda jaǵdaı qaıta turaqtaldy, — dedi Sebasten Lekornıý.
Eske salaıyq, buǵan deıin Frantsııanyń ońtústik-batysyndaǵy Jıronda departamentinde bolǵan iri orman órti oqshaýlanǵanyn, alaıda elde tabıǵı órtterge qatysty ahýal áli de kúrdeli ekenin habarlaǵanbyz. Jaz basynan beri Frantsııada 119 myń gektar orman alqaby janyp ketken.
