Frantsııada orman órtine qatysy bar degen kúdikpen 474 adam ustaldy

Frantsııa Іshki ister mınıstrliginiń málimetinshe, ustalǵandardyń shamamen 70%-y órtti qasaqana qoıdy degen kúdikke ilingen. Qalǵandary órttiń abaısyz áreket saldarynan shyǵýyna sebep bolýy múmkin degen kúdikpen ustalǵan.

Ustalǵandardyń arasynda 15 jastaǵy jasóspirim de bar. Ol shilde aıynda Bordo áýejaıy mańynda bolǵan órtke qatysy bar degen kúdikke ilindi. Sol órtten eki órt sóndirýshi qaza tapqan.

Frantsııanyń ońtústik-batysynda órtpen kúres jalǵasyp jatyr. Land departamentindegi Lıýglon eldi mekeninen 525-ten astam adam evakýatsııalandy. Bir táýlikke jetpeıtin ýaqytta órt 1,1 myń gektarǵa jýyq qurǵaq qaraǵaıly ormandy sharpyǵan.

Órtti sóndirýge 500-ge jýyq órt sóndirýshi men sý shashatyn alty áýe kemesi jumyldyryldy. Eldi mekenge aparatyn joldar jabyldy.

Eýropanyń basqa elderinde de orman órtteri jalǵasyp jatyr. Germanııada Hıýrtgen ormanyndaǵy órtke baılanysty 2 myńnan astam adam úılerin tastap ketýge májbúr boldy.

Horvatııadaǵy kýrorttyq aımaqtaǵy órtten bir adam qaza taýyp, ondaǵan adam zardap shekti. Shamamen 1,2 myń turǵyn men týrıst evakýatsııalandy.

Ispanııada bir órt 9 myń gektardan astam aýmaqty joıyp, 16 eldi mekendi evakýatsııalaýǵa sebep boldy. Ýelva provıntsııasyndaǵy taǵy bir iri órt shamamen 31 myń gektar jerdi sharpydy.

Grekııada Halkıdıkı túbegindegi orman órti jaqyndaýyna baılanysty jaǵajaılardan 500-ge jýyq demalýshy evakýatsııalandy.

Eýropalyq Odaqtyń «Kopernık» klımattyń ózgerý qyzmeti Ortalyq jáne Shyǵys Eýropanyń birqatar óńirinde uzaqqa sozylǵan aptap ystyqqa baılanysty órt qaýpi «óte joǵary» deńgeıge jetkenin eskertti.

Buǵan deıin Frantsııada rekordtyq ystyq pen qurǵaqshylyqqa baılanysty 50 departamentte orman órti qaýpine baılanysty qyzǵylt sary deńgeıdegi eskertý jarııalanǵan bolatyn.

Aıta ketelik Frantsııanyń ońtústik-shyǵysynda 400-den astam órt sóndirýshi tilsiz jaýmen kúresip jatqany týraly jazǵan edik.