Frantsııada oppozıtsııanyń úkimetke senimsizdik votýmyn jarııalaýy sátsiz aıaqtaldy

ASTANA. KAZINFORM — Frantsııada 2026 jylǵa arnalǵan bıýdjetti Ulttyq jınalysty aınalyp ótip qabyldaǵan úkimetke senimsizdik votýmyn jarııalaý jónindegi oppozıtsııa áreketteri depýtattardyń jetkilikti qoldaý kórsetpeýine baılanysty sátsizdikke ushyrady. Bul týraly Anadolý jazdy.

Frantsııanyń premer-mınıstri Sebastıan Lekornıýge senimsizdik bildirý týraly eki rezolıýtsııany ásiresolshyl «Baǵynbaǵan Frantsııa» (LFI) partııasy men ásireońshyl «Ulttyq birlik» (RN) partııasy usyndy. Eki usynys ta Ulttyq jınalysta daýysqa salyndy.

LFI usynǵan senimsizdik rezolıýtsııasyn 260 depýtat qoldasa, RN bastamasyn 135 depýtat qoldady. Úkimettiń otstavkaǵa ketýi úshin qajetti 289 daýysqa birde-bir rezolıýtsııa jete almady. Eki votýmnyń da ótpeı qalýynda Sotsıalıstik partııa (PS) depýtattarynyń úkimetti qoldaýy sheshýshi ról atqardy.

Qańtar aıynda Sebastıan Lekornıý oppozıtsııamen ymyraǵa kele almaýyna baılanysty Konstıtýtsııada kózdelgen ókilettigin paıdalanyp, 2026 jylǵa arnalǵan bıýdjet jobasy týraly zańdy parlamentte daýys berýsiz qabyldaıtynyn málimdegen edi.

Frantsııa Konstıtýtsııasynyń 49-babynyń 3-tarmaǵyna sáıkes, úkimet Ulttyq jınalysta daýys berýsiz zań qabyldaýǵa quqyly. Al jaýap retinde oppozıtsııa senimsizdik votýmyn engize alady.

Eger senimsizdik rezolıýtsııasyn depýtattardyń basym kópshiligi qoldasa, úkimet otstavkaǵa ketedi. Al votým qajetti kópshilikke ıe bolmasa, zań daýys berýsiz qabyldandy dep eseptelip, Senatqa joldanady. Sońǵy eki jyl qatarynan Frantsııada bılik pen oppozıtsııa arasynda bıýdjettik máseleler boıynsha kelisimge qol jetkizý múmkin bolmaı otyr. Bul jaǵdaı sozylmaly saıası turaqsyzdyqqa jáne úkimettiń álsireýine alyp kele jatyr.

Eske sala ketsek, byltyr kúzde Chehııa Prezıdenti úkimettiń otstavkasyn qabyldady.

Al osy jylǵy qańtar aıynda Iemen úkimeti otstavkaǵa ketti.