Frantsııada oqýshylardyń narazylyq aktsııasynda 400-den astam adam ustaldy
ASTANA. KAZINFORM — Seısenbi kúni Frantsııada joǵary synyp oqýshylarynyń narazylyq aktsııasyna qatysqan 400-den astam adam ustaldy, dep habarlaıdy Kazinform VVS-ge silteme jasap.
Frantsııanyń ishki ister mınıstri Loran Nýnestiń aıtýynsha, ustalǵandardyń basym bóligi — kámeletke tolmaǵandar.
Seısenbi kúngi narazylyq kezinde keminde 10 muǵalim, birneshe oqýshy jáne quqyq qorǵaý organdarynyń 48 qyzmetkeri jaraqat aldy.
Bilim mınıstrliginiń málimetinshe, narazylyqtan keminde 400 mekteptiń qalypty jumysyna kedergi keltirilgen.
Parıjde bastalyp, birneshe kúnge sozylǵan narazylyq aktsııalarynda oqýshylar mektepterin jaýyp, sabaq ótkizýge kedergi keltirdi. Buǵan synyptardyń shamadan tys tolyp ketýi, muǵalimderdiń jetispeýi sııaqty máseleler túrtki bolǵan.
Frantsýz BAQ-tarynyń habarlaýynsha, narazylyqqa qatysýshylar polıtsııaǵa túrli zattar laqtyrǵan. Quqyq qorǵaý organdary olarǵa rezeńke taıaq pen kózden jas aǵyzatyn gaz qoldanǵan.
Frantsııanyń bilim mınıstri Edýar Jeffreı oqýshylardyń narazylyq bildirýge quqyǵy bar ekenin aıtty. Alaıda narazylyq kezinde kúsh qoldanylǵany týraly habarlardy orynsyz dep baǵalap, mundaı áreketterge jol berýge bolmaıtynyn atap ótti.
Seısenbi kúni stýdentterdiń narazylyq sharalarymen qatar muǵalimder, medıtsına qyzmetkerleri men memlekettik qyzmetshilerdiń kásipodaqtary da jalpyulttyq ereýil ótkizdi. Olar jalaqynyń azdyǵyna jáne eńbek jaǵdaıyna qarsylyq bildirdi.
Habarlamalarǵa qaraǵanda, keminde 200 myń adam qatysqan bul narazylyq sharalarynyń basym bóligi tynysh ótken.
Buǵan deıin Frantsııadaǵy oqýshylardyń narazylyǵy júzdegen mekteptiń jumysyna kedergi keltirgeni habarlanǵan bolatyn.
