Frantsııada oqýshylar narazylyǵy kezinde 24 oqý orny búlindi
ASTANA. KAZINFORM – Frantsııada joǵary synyp oqýshylarynyń narazylyǵy kezinde 24 oqý ornynda órt shyǵyp, ǵımarattar búlindi, dep habarlaıdy Kazinform agenttiginiń menshikti tilshisi jergilikti BAQ-qa silteme jasap.
Bul týraly jeksenbi kúni Ulttyq bilim mınıstri Edýar Jeffre France 2 telearnasy men France Inter radıosynyń efırinde málimdedi.
Onyń aıtýynsha, qaýipsizdik talaptary saqtalmaǵan 400-500 lıtseıde dúısenbi, 5 qazan kúngi sabaqtar tolyqtaı nemese ishinara toqtatyldy. Buǵan materıaldyq shyǵyn men qyzmetkerlerge jasalǵan shabýyldar sebep bolǵan.
– Bul jaǵdaı qyzmetkerlerimiz ben oqýshylarymyzdyń qaýipsizdigine tikeleı qater tóndiredi. Ulttyq bilim berý júıesiniń 78 qyzmetkeri jaraqat aldy. Biz buǵan deıin mundaı jaǵdaıǵa tap bolǵan emespiz. Olarǵa qasaqana shabýyl jasaldy, – dedi Jeffre. Mınıstrdiń aıtýynsha, qozǵalysqa radıkaldy solshyl toptardyń belsendileri aralasyp, bastamany lıtseı oqýshylarynan «tartyp alǵan» jáne óte qatal áreket etken.
Narazylyqtar 17-21 qyrkúıek aralyǵynda Il-de-Frans óńirindegi Kreteı akademııasynda bastalyp, keıin búkil elge tarady. Negizinen, 15-18 jastaǵy qatysýshylar muǵalim jetispeýshiligin sheshýdi, synyptardaǵy oqýshy sanyn azaıtýdy, ǵımarattardy jóndeýdi jáne oqý kestesin jeńildetýdi talap etti. Sonymen qatar olar Parcoursup júıesine qatysty da shaǵym aıtty. Lıtseı oqýshylarynyń USL uıymy men Union étudiante stýdentter kásipodaǵy 1 qazandy narazylyqtyń «ekinshi kezeńi» dep jarııalap, aktsııalardy 6 qazanda jalǵastyrýǵa shaqyrdy.
Bılik narazylyqtardyń oqý oryndaryn qorshaýdan kóshedegi tártipsizdikterge ulasqanyn habarlady. Nant qalasynda órtten Nelson Mandela atyndaǵy lıtseıdiń kireberisi men ishki bólmeleri búlinip, shyǵyn 2 mıllıon eýrodan asty. Rýan, Marsel jáne basqa qalalarda da ǵımarattar búlindi. Marselde mektep qyzmetkerlerine benzın shashylyp, órt sóndirý kóligi órtendi.
Іshki ister mınıstrliginiń málimetinshe, apta basynan beri 5 myńnan astam adam ustaldy, olardyń kóbi kámeletke tolmaǵandar. Sonymen qatar júzdegen polıtsııa qyzmetkeri men jandarm jaraqat aldy. Premer-mınıstr Sebasten Lekornıý vedomstvoaralyq daǵdarys shtabynyń otyrysyn ótkizip, narazylyqtardyń ýshyǵýyn jaýapsyzdyq dep atady. Úkimet bul jaǵdaıdyń radıkaldanýyn ýltrasolshyl kúshtermen, sonyń ishinde «Búlikshil Frantsııa» partııasynyń jaqtastarymen baılanystyrady.
Buǵan deıin frantsýz oqýshylarynyń narazylyǵy 1 qazanda kórshiles Belgııaǵa da jetkeni habarlanǵan bolatyn.
