Frantsııada narazylyqtarǵa baılanysty 70 myń polıtseı men jandarm kóshege shyqty
ASTANA. KAZINFORM – Frantsııada jappaı narazylyq aktsııalarynyń jańa tolqynyna baılanysty 70 myń polıtseı men jandarm jumyldyryldy. Bılik joldar men temirjol vokzaldaryndaǵy baqylaýdy kúsheıtip, birqatar qala ortalyǵynda sherýler ótkizýge tyıym saldy, dep habarlaıdy Euronews.
7 qarasha, senbi kúni el aýmaǵynda ómir súrý qunynyń ósýine qarsy jáne jastardy qoldaýǵa arnalǵan ondaǵan narazylyq aktsııasy ótip jatyr. Qatysýshylar eń tómengi jalaqyny kóterýdi, eńbek jaǵdaıyn jaqsartýdy, memlekettik qyzmetterdi qorǵaýdy jáne bilim berý salasyn qarjylandyrýdy arttyrýdy talap etip otyr.
Parıjde kásipodaqtar men stýdenttik uıymdar Respýblıka alańynan Ult alańyna deıin kelisilgen sherý ótkizýde. Al «Sary keýdesheliler» qozǵalysy bıliktiń tyıymyna qaramastan, Konkord alańynda jeke aktsııa uıymdastyrýdy josparlap otyr.
Qozǵalys ókilderi jaqtastaryn jappaı azamattyq baǵynbaýǵa shaqyrdy.
Frantsııanyń ishki ister mınıstri Loran Nýnestiń aıtýynsha, narazylyqtardy uıymdastyratyn biryńǵaı ortalyqtyń bolmaýy tártipsizdik qaýpin arttyrady. Qoǵamdyq qaýipsizdikti qamtamasyz etý úshin el boıynsha 70 myń polıtsııa jáne jandarmerııa qyzmetkeri jumyldyrylǵan. Joldar men temirjol vokzaldarynda qosymsha tekserý sharalary júrgizilip jatyr.
Narazylyq aktsııalary aıasynda kúsh qoldaný oqıǵalaryna qatysty tergeý jumystary da jalǵasýda. Demonstratsııa kezinde zardap shekken keminde 18 adamnyń advokattary polıtsııa qyzmetkerlerin shamadan tys kúsh qoldandy dep aıyptap, Іshki ister mınıstrine qarsy sotqa talap-aryz túsirýge nıetti.
Sonymen qatar Po qalasynyń prokýratýrasy polıtsııa qyzmetkerlerine pırotehnıkalyq quraldardy qoldanyp shabýyl jasady degen kúdikpen tórt kámeletke tolmaǵan jasóspirimge qatysty tergeý bastady.
9 qarashada Frantsııa premer-mınıstri Sebastıan Lekornıý kásipodaqtar men jumys berýshiler ókilderimen kezdesedi. Taraptar jalaqy jáne halyqtyń satyp alý qabiletine qatysty máselelerdi talqylaıdy.
Buǵan deıin Frantsııada jappaı narazylyq kezinde 400-den astam adam ustalǵany habarlanǵan edi. Іshki ister mınıstrliginiń málimetinshe, 5 qarashadaǵy sherýlerge shamamen 575 myń adam qatysqan. Al kásipodaqtar qatysýshylar sanyn 1,6 mıllıon adam dep baǵalaǵan.