Frantsııada narazylyq ýshyǵyp, Marselde ondaǵan dúken tonaldy
ASTANA. IKAZINFORM — Frantsııanyń túkpir-túkpirinde iri narazylyq aktsııalary ótip jatyr. Keı jerlerde polıtsııaǵa shabýyl jasalyp, qalalyq ınfraqurylym nysandary búlingen. Bul týraly Kazinform agenttiginiń Eýropalyq odaqtaǵy menshikti tilshisi habarlady.
Negizinen jastar qatysqan narazylyq aktsııalary ómir súrý qunynyń qymbattaýyna, jumys oryndarynyń tapshylyǵyna jáne bilim berý júıesiniń uıymdastyrylýyna narazylyq bildirý maqsatynda ótip jatyr.
Parıjde jastar men polıtsııa arasynda eleýli qaqtyǵystar boldy. Eldegi ekinshi iri qala Marsel de eń qatty qaqtyǵystardyń ortalyǵyna aınaldy.
Tańerteńnen bastap tonaýshylar Eski port mańyndaǵy qalalyq ákimdik ǵımaratyna basyp kirgen. Olar kóshe qorshaýlaryn paıdalanyp, 1673 jyldan beri saqtalǵan esikti buzyp kirgen. Ǵımarat ishine engender mádenı qundylyqtardy búldirip, Marıanna bıýstin aýdaryp tastaǵan, jıhazdardy syndyrǵan. Qabyrǵalarǵa «A» sımvoly men ACAB jazýy salynǵan.
— Bul — revolıýtsııa, Bastılııany alamyz, — dep aıqaılaǵan basyp kirgenderdiń biri.
Marsel aımaǵynyń prefektisi Jak Vıtkovskııdiń málimetinshe, tústen bastap kóshelerde narazylyq bildirýshiler emes, tonaýmen aınalysqan 7–8 myń adam júrgen. Otyz-qyryq dúken tonalǵan. Fnac elektronıka dúkeni túgeldeı derlik bosatylǵan. Jakoben alańyndaǵy Hugo Boss dúkeni, sondaı-aq Lancel, K-Way jáne Luxury Outlet saýda oryndary zardap shekken.
Saǵat 17:15–tegi málimet boıynsha, quqyq qorǵaý organdarynyń 29 qyzmetkeri jaraqat alǵan, olardyń ekeýi aýrýhanaǵa jetkizilgen. Sonymen qatar, jınalǵandar arasynan 20-ǵa jýyq adam zardap shekken. 20–30 adam ustalǵan.
Marsel meri Benýa Paıan narazylyq bildirýshilerdiń áreketin jol berýge bolmaıtyn jaǵdaı dep atap, tańerteń qalada polıtsııa qyzmetkerleriniń jetkiliksiz bolǵanyna shaǵymdandy.
Frantsııa prezıdenti Emmanıýel Makronmen telefon arqyly sóıleskennen keıin Parıjden qosymsha kúsh jiberýge ýáde berilgen. Olardyń qatarynda CRS arnaıy polıtsııasynyń úsh rotasy men Centaure úlgisindegi eki brondy kólik bar.
— Búgin tústen keıin biz betpe-bet kelgen búlikshilerdiń sany Marsel úshin buryn-sońdy bolmaǵan deńgeıde. Túski ýaqytta mundaı aýqymdy tolqýlar bolǵanyn esimizge túsire almaımyz, — dedi prefekt.
Al Frantsııa premer-mınıstri Sebastıan Lekornıý prezıdenttik saılaý qarsańynda zorlyq-zombylyqty «daıyndyq quraly» retinde paıdalanǵysy keletinderdiń áreketinen qoryqpaıtynyn málimdedi.
Frantsııadaǵy oqýshylar kótergen másele nege saıası sıpat alǵanyn sholý maqaladan oqyńyz.
