Frantsııada mıllıondaǵan eýro turatyn Renýar kartınalary DNQ arqyly tabyldy
ASTANA. KAZINFORM – Frantsııada tergeýshiler DNQ saraptamasy men avtokólik qozǵalysyn baqylaý derekteriniń kómegimen mýzeıden urlanǵan áıgili sýretshi Per Ogıýst Renýardyń eki kartınasyn tapty, dep habarlaıdy Euronews.
Quny mıllıondaǵan eýro bolatyn «Madam Kolonna Romanonyń portreti» jáne «Qudyq basyndaǵy jas áıel» kartınalary qyrkúıek aıynda Frantsııanyń Lazýr jaǵalaýyndaǵy Kan-sıýr-Mer qalasynda ornalasqan Renýar mýzeıinen urlanǵan.
Tergeý málimetinshe, kúdiktiler elektr quralymen mýzeı qorshaýyn kesip, ishke kirgen. Olar tórt kartınanyń bekitkishterin kesip úlgergenimen, osy sátte dabyl júıesi iske qosylǵan.
Marsel qalasynyń prokýrory Nıkolıa Bessonnyń aıtýynsha, dabyldan seskengen urylar qashyp bara jatyp, eki kartınany tastap ketken. Keıin bul týyndylar arnaıy qorǵanysh qaptamasynyń ishinen tabylǵan.
Tergeýdegi sheshýshi aıǵaq ta osy qaptamadan anyqtalǵan.
– Qaptamadan tabylǵan DNQ buryn esirtki saýdasyna qatysty is boıynsha tergeýge ilikken 29 jastaǵy er adamnyń genetıkalyq derekterimen sáıkes keldi. Onyń avtokóligi de tergeý aıasynda baqylaýda bolǵan. Qozǵalys derekterin zertteý nátıjesinde kúdiktiniń urlyqtan keıin 41 jastaǵy er adammen birge úshinshi adamnyń úıine barǵany anyqtaldy, – dedi Nıkolıa Besson.
Osy derekterdiń kómegimen tergeýshiler qylmysqa qatysy bolýy múmkin adamdardyń baılanysyn anyqtaǵan.
Tergeý barysynda kúdiktilerdiń taǵy bir óner týyndysyn urlaýdy josparlaýy múmkin ekeni belgili boldy.
Atap aıtqanda, 3 qazanda 29 jastaǵy kúdiktiniń Sen-Pol-de-Vans qalasyndaǵy Mag qoryna barǵany tirkelgen.
1964 jyly ashylǵan bul mádenıet mekemesinde Per Bonnar, Jorj Brak jáne Alberto Djakomettı sekildi tanymal sýretshilerdiń týyndylary saqtalǵan.
Budan keıin kúdikti 2000 jyldardyń basynda óner týyndylaryn urlaý jáne qoldan jasaý isteri boıynsha polıtsııaǵa burynnan belgili adammen kezdesken.
Prokýrordyń aıtýynsha, dál osy jaǵdaı quqyq qorǵaý organdaryn shuǵyl áreket etýge ıtermelegen.
– Jańa tonaý áreketi jaqyn arada jasalýy múmkin degen óte salmaqty kúdik týyndady. Sondyqtan kúdiktilerdi ustaý týraly sheshim qabyldandy, – dedi Nıkolıa Besson.
Tergeý barysynda úshinshi kúdiktiniń urlanǵan kartınalardy úıindegi baspaldaq astyndaǵy qabyrǵanyń artyna jasyrǵany anyqtalǵan.
Quqyq qorǵaý qyzmetkerleri Renýardyń eki kartınasyn sol jerden tárkilep, qaıtaryp alǵan.
Qazirgi ýaqytta is boıynsha tórt er adamǵa aldyn ala aıyp taǵylǵan. Tergeý jalǵasyp jatyr.
