Frantsııada memlekettik qyzmetkerler taǵy da jappaı narazylyqqa shyqty
ASTANA. KAZINFORM — Frantsııada memlekettik sektor qyzmetkerleri taǵy da jalpyhalyqtyq ereýilge shyqty. Kásipodaqtar turmys qunynyń ósýine jáne 2027 jylǵy memlekettik bıýdjet jobasynyń daıyndalýyna baılanysty jalaqyny kóterýdi talap etip otyr. Bul týraly Euronews jazdy.
Basylymnyń málimetinshe, narazylyq aktsııalary segiz aptaǵa jýyq ýaqyttan beri jalǵasyp keledi. Alǵashynda, qyrkúıektiń ortasynda, oqý jaǵdaıyna narazy mektep oqýshylary men stýdentter kóshege shyqqan. Keıin aktsııalarǵa halyqtyń basqa toptary da qosyldy. Narazylyqtyń negizgi sebepteriniń qatarynda turmys quny men janarmaı baǵasynyń ósýi bar.
Kezekti ereýil qarsańynda kásipodaq ókilderi Frantsııa premer-mınıstri Sebasten Lekornıýmen kezdesti. Alaıda kelissózder nátıjesiz aıaqtaldy.
Qoǵamdaǵy shıelenisti báseńdetýge tyrysqan úkimet memlekettik sektordaǵy eń tómen jalaqy alatyn qyzmetkerlerdiń eńbekaqysyn segiz ındekstik tarmaqqa kóterýge ýáde berdi. Budan bólek, bılik eń tómengi jalaqyny 1 jeltoqsannan bastap merziminen buryn arttyrý týraly sheshim qabyldady.
Sonymen birge úkimet 2027 jylǵy bıýdjet jobasynda memlekettik qyzmetkerlerdiń jalaqysyn jalpyǵa birdeı ındeksteýden tórtinshi jyl qatarynan bas tartty. Mundaı sheshimdi bıýdjet tapshylyǵy men memlekettik qaryzdyń ósýimen túsindirdi.
Kásipodaqtar bıliktiń bul ustanymyn qabyldaýǵa bolmaıtynyn málimdedi. Olardyń baǵalaýynsha, 2017 jyldan beri memlekettik sektor qyzmetkerleriniń naqty satyp alý qabileti 16 paıyzǵa tómendegen. Sonyń saldarynan qyzmetkerlerdiń kóbi eń tómengi jalaqyǵa teń nemese soǵan jaqyn eńbekaqy alady.
Frantsııa Іshki ister mınıstrliginiń málimetinshe, keıingi aptalarda sherýge qatysýshylar sany birtindep azaıyp keledi. Aktsııalardyń basym bóligi beıbit ótedi. Degenmen jekelegen qalalarda polıtsııamen qaqtyǵystar bolyp, quqyq qorǵaý organdarynyń qyzmetkerleri men jýrnalısterge shabýyl jasalǵan. Sondaı-aq ákimshilik ǵımarattarǵa zaqym keltirý derekteri tirkelgen.
Sonymen qatar narazylyqqa qatysýshylar men quqyq qorǵaý uıymdary polıtsııany kúshti shamadan tys qoldandy dep aıyptap otyr. Osyǵan baılanysty yqtımal zańbuzýshylyqtar boıynsha birneshe tergeý bastalǵan.
Frantsııadaǵy jappaı tártipsizdikter qoǵamdaǵy áleýmettik qaıshylyqtardy ýshyqtyryp, prezıdent saılaýy qarsańyndaǵy saıası tartysty kúsheıtti. Turmys qunynyń qymbattaýyna jáne memlekettik shyǵyndardyń qysqarýyna qarsy narazylyqtardyń astarynda áldeqaıda kúrdeli máseleler jatyr. Olardyń qatarynda radıkaldy qozǵalystardyń kúsheıýi men ımmıgranttar qaýymdastyǵynyń frantsýz qoǵamyna beıimdelýindegi qıyndyqtar bar. Bul faktorlardyń bir-birimen qalaı baılanysatyny jáne Frantsııa saıasatyna qandaı áser etýi múmkin ekeni týraly Kazinform agenttiginiń materıalynan oqı alasyz.