Frantsııada kıbershabýyldan zardap shekken 678 myń adamǵa habarlama jiberiledi
ASTANA. KAZINFORM — Frantsııada salyq qyzmetine jasalǵan kıbershabýyldan zardap shekkenderge habarlama 17 tamyzdan bastap jiberiledi.
Naqty málimet boıynsha, shabýyl saıttyń shamamen 678 myń paıdalanýshysyna — jeke tulǵalar men kompanııalarǵa áser etken.
Frantsııanyń Memlekettik qarjy bas basqarmasy qaskóılerdiń qupııa aqparatty kórý jáne kóshirip alý múmkindigine ıe bolǵanyn habarlady. Jeke tulǵalarǵa qatysty urlanǵan málimetterdiń ishinde eseptelgen salyq salynatyn tabys pen tólem kózinen ustalatyn salyq mólsherlemesi bolǵan.
Sonymen birge vedomstvo qaskóıler alǵan derekter salyq qyzmetiniń saıtyndaǵy paıdalanýshylardyń qorǵalǵan jeke kabınetterine kirýge múmkindik bermeıtinin atap ótti.
Kompanııalarǵa qatysty fırmalyq ataýlar men SIREN sáıkestendirý nómirleri sııaqty málimetter buzylǵan.
Memlekettik qarjy bas basqarmasynyń málimetinshe, aqparattyq júıelerge zańsyz kirý 2026 jyldyń maýsym jáne shilde aılarynda bolǵan. Buǵan salyq qyzmeti qyzmetkeri men ýákiletti úshinshi tulǵanyń eseptik derekterin almastyrý arqyly qol jetkizilgen.
Memlekettik qarjy bas basqarmasynyń bas dırektory Amelı Verde zardap shekkenderden keshirim surap, bul shabýyldyń vedomstvo buǵan deıin tap bolǵan shabýyldarǵa qaraǵanda kúrdelirek bolǵanyn aıtty.
Parıj prokýratýrasy derekterdi alaıaqtyq jolmen alý jáne qylmystyq sóz baılasý faktileri boıynsha tergeý bastady. Tergeý jumysy Frantsııa Ulttyq polıtsııa bas basqarmasynyń quramyna kiretin Kıberqylmysqa qarsy kúres basqarmasyna tapsyryldy.
Frantsııa bıligi memlekettik aqparattyq júıelerdi qorǵaýdy kúsheıtýdi de josparlap otyr.
Osy maqsattaǵy baǵdarlamany iske asyrýǵa qazirdiń ózinde 200 mıllıon eýro qarastyrylǵan. Qarajattyń bir bóligi jasandy ıntellekt salasyndaǵy múmkindikterdi damytýǵa baǵyttalmaq.
Buǵan deıin Frantsııanyń Memlekettik qarjy bas basqarmasynyń aqparattyq júıelerine kıbershabýyl jasalǵany habarlanǵan bolatyn. Ol kezde zardap shekkenderdiń naqty sany resmı túrde aıtylmaǵan edi.
Aıta ketelik eGov buzylmady: Mınıstrlik 15 mln adamnyń deregi tarady degen aqparatqa núkte qoıǵan edi.
