Frantsııada qaýipti ınfektsııaǵa baılanysty Chavegrand irimshikteri satylymnan alyndy

ASTANA. KAZINFORM – Frantsııada lısterıoz ınfektsııasynyń órshýine baılanysty Chavegrand markasynyń brı jáne kamamber sııaqty suranysqa ıe jumsaq irimshikteri sórelerden alynyp tastaldy, dep habarlaıdy Euronews.

Frantsııanyń qoǵamdyq densaýlyq saqtaý agenttiginiń dereginshe, 34 pen 95 jas aralyǵyndaǵy 21 adam syrdan ýlanǵan. Eki adam kóz jumdy.

Sarapshylar bul jaǵdaıdyń Chavegrand kompanııasy óndirgen pasterlengen sútten jasalǵan irimshikterdi tutynýmen baılanysy bolýy múmkin ekenin anyqtady.

Lısterıoz – sırek kezdesetin, biraq ólim-jitim qaýpi joǵary bakterııalyq ınfektsııa. Kóbine ol lastanǵan taǵamdy tutyný arqyly juǵady. Aýrýdyń alǵashqy belgileri – dene qyzýy, bulshyqet aýyrýy, dıareıa, qaltyraý. Júkti áıelder, sábıler, egde jastaǵylar jáne ımmýnıteti álsiz adamdar qaýip tobyna jatady.

Frantsýz bıligi turǵyndarǵa atalǵan markaly irimshikti tutynbaýǵa, al jegen jaǵdaıda segiz aptaǵa deıin densaýlyq jaǵdaıyn baqylaýǵa keńes berdi. Dene qyzýy kóterilip, bas aýrýy nemese dene syrqyraý belgileri baıqalsa, dereý dárigerge qaralý qajet.

Aıta keteıik, Frantsııanyń 14 departamentinde aptap ystyqqa baılanysty «qyzyl» deńgeıdegi dabyl jarııalandy.