Frantsııada qala ákimdigine shabýyl jasaldy

ASTANA. KAZINFORM - Parıj mańyndaǵy Fren qalasynda (Val-de-Marn departamenti) belgisiz top qala ákimdigi ǵımaratyna shabýyl jasady. Bul týraly Kazinform agenttiginiń Eýroodaqtaǵy menshikti tilshisi habarlady.

Le Figaro dereginshe, oqıǵa senbige qaraǵan túni — jańa mýnıtsıpaldyq komandanyń qyzmetine resmı kirisýine birneshe saǵat qalǵanda bolǵan. Qara kıim kıip betin tumshalap alǵan shamamen 20 adam Per jáne Marı Kıýrı alańyndaǵy ákimdik ǵımaratynyń qasbetine pırotehnıkalyq quraldardy qoldanyp shabýyl jasaǵan.

Kireberis esikterdi buzyp kirgen shabýyldaýshylar ǵımarat ishinde oıran salǵan: jıhaz búlinip, birneshe kabınet tonalǵan. Keri shegingen kezde olar avtomekteptiń vıtrınasyn syndyryp, mototsıkldi urlap ketken, sondaı-aq jergilikti bank bólimshesiniń qasbetine zııan keltirgen.

15 naýryzda ótken mýnıtsıpaldyq saılaýda ońshyl-ortalyq baǵyttaǵy «Respýblıkalyqtar» partııasynan kandıdat Krıstof Karle nebári 107 daýys aıyrmasymen solshyl kópshilikti artta qaldyryp, jeńiske jetken bolatyn.

Shabýyl jańa ákimshilikke qysym kórsetý áreketi bolýy múmkin ekendigi de aıtyldy. Oqıǵaǵa qaramastan, senbi kúni tańerteń mýnıtsıpaldyq keńes Іl-de-Frans óńiriniń prezıdenti Valerı Pekressniń qatysýymen jınalyp, Krıstof Karledi resmı túrde qala meri etip saılady.

Frantsııanyń ishki ister mınıstri Loran Nýnes te bul oqıǵany qatań aıyptady.

Onyń aıtýynsha, ákimdikke jasalǵan shabýyl — respýblıkaǵa qarsy tikeleı shabýyl.

-Bul vandalızm áreketine qatysy bar tulǵalardy anyqtap, ustaý jáne jaýapqa tartý úshin bar kúshimizdi salamyz, — dedi mınıstr.

Tergeý isi Val-de-Marn aýmaqtyq qaýipsizdik qyzmetine tapsyryldy.

Osyǵan deıin Frantsııada 770 myń stýdenttiń jeke derekteri jarııa bolǵany týraly jazdyq.

https://kaz.inform.kz/news/frantsiyada-770-min-studenttn-zheke-derekter-zhariya-boldi-1f1f1a/