Frantsııada ımmıgratsııany shekteý usynyldy
ASTANA. KAZINFORM — Frantsııanyń Ádilet mınıstri Jerald Darmanen elge keletin mıgratsııany úsh jylǵa ýaqytsha toqtatýdy usyndy, dep habarlaıdy DW.
Onyń aıtýynsha, Frantsııa shetel azamattaryn qoǵamǵa beıimdeý jáne sińistirý máselesinde «múmkindiginiń shegine» jetken.
Mınıstr Parıjge kóshi-qon saıasatyn qatańdatyp, el aýmaǵynda qazirdiń ózinde turyp jatqan mıgranttardy beıimdeýge basymdyq berý qajet ekenin aıtty.
— Immıgratsııany toqtataıyq, elden shyǵarylýy tıis adamdardy shyǵaraıyq, vızalardy Frantsııa aýmaǵynan ketý týraly talaptardy oryndaýǵa baılanysty bereıik jáne qazir elde júrgen azamattardy qoǵamǵa beıimdeýmen aınalysaıyq, — dedi Jerald Darmanen.
Mınıstr sondaı-aq otbasyn biriktirý baǵdarlamasy arqyly beriletin turýǵa ruqsat qujattaryn shekteýdi usyndy.
Bul Frantsııada eńbek negizinde turýǵa ruqsat alǵan sheteldikterdiń týystaryna qatysty.
Budan bólek, Darmanen mıgratsııalyq kvota engizýge múmkindik beretin Konstıtýtsııa reformasyn qoldady.
Onyń pikirinshe, memleket qabyldanatyn mıgranttardyń sanyn rettep qana qoımaı, olardyń shyqqan eli men kásibı biliktiligin de eskerýi kerek.
Frantsııada mıgratsııa máselesi eldiń saıası kún tártibindegi eń ózekti taqyryptardyń biri bolyp otyr.
Jańa málimdemelerge Frantsııa Іshki ister mınıstrliginiń sońǵy derekteri sebep bolǵan.
Resmı statıstıkaǵa sáıkes, 2025 jyly Frantsııada rekordtyq 4,5 mıllıon adamnyń turýyna ruqsat qujaty berilgen.
Olardyń ár úshinshisi otbasyn biriktirý negizinde rásimdelgen.
Frantsııa bıliginiń málimetinshe, búginde elde zańdy túrde turyp jatqan shetel azamattary eresek halyqtyń 8 paıyzdan astamyn quraıdy.
Buǵan deıin Qazaqstan joǵary bilikti mamandardy tartý baǵytyndaǵy kóshi-qon saıasatyn jańartatyny týraly jazdyq.
