Frantsııada «Gorettı» daýyly saldarynan 92 myń úı jaryqsyz qaldy

ASTANA. KAZINFORM – Frantsııada «Gorettı» daýylynyń saldarynan 92 myń turǵyn úı áli kúnge deıin elektr energııasynsyz otyr. Bul týraly Anadolu Ajansı habarlady.

Frantsııadaǵy elektr jelilerine qyzmet kórsetetin Enedis kompanııasynyń málimetinshe, daýyldan keıin elektr qýaty óshken 380 myń úıdiń tórtten úshinen astamynda jaryq qalpyna keltirilgen. Degenmen Mansh, Kalvados, Prımorskaıa Sena, Er jáne Orn departamentterindegi 92 myń úıde elektrmen jabdyqtaý áli de qalpyna kelmegen.

Qazirgi ýaqytta barlyq óńirde elektr energııasyn qaıta qosý jumystary júrgizilip jatyr.

«Gorettı» daýyly elektr energııasyn óndirýge de áser etti. Memlekettik Franceinfo habarlaýynsha, Électricité de France (EDF) kompanııasy 8 qańtarǵa qaraǵan túnnen bastap Flamanvıl atom elektr stantsııasyndaǵy reaktorlarda elektr energııasyn óndirýdi ýaqytsha toqtatqan.

Mamandardyń aıtýynsha, daýyl kezinde jeldiń jyldamdyǵy saǵatyna 200 shaqyrymǵa deıin jetken. Al Soltústik Normandııadaǵy Gattevıl aýylynda jeldiń ekpini saǵatyna 213 shaqyrym bolǵany tirkeldi.

Frantsııanyń Іshki ister mınıstrligi «Gorettı» daýyly saldarynan alty adamnyń jeńil jaraqat alǵanyn habarlady.

Buǵan deıin Belgııa men Frantsııanyń birqatar óńirinde «Gorettı» daýylynyń ótýine baılanysty kúrdeli meteorologııalyq jaǵdaı qalyptasqany týraly aqparat taraǵan edi.