Frantsııada ereýil bolyp jatyr: narazylar Ekonomıka mınıstrligine basyp kirdi

ASTANA. KAZINFORM — Búgin búkil Frantsııa aýmaǵynda eńbekshilerdiń kezekti aýqymdy ulttyq ereýili ótýde, dep habarlaıdy Kazinform tilshisi.

Narazylyqtar «Barlyǵyn buǵattaıyq» áleýmettik qozǵalys toby uıymdastyrǵan ótken aptadaǵy ereýilden keıin qaıta jalǵasty. 10 qyrkúıek kúni Frantsııa premer-mınıstri qyzmetine Sebasten Lekornıý taǵaıyndalǵan bolatyn, al búgingi sharalar sonyń aıasynda jańa serpin aldy.

Kásipodaq uıymdary jazda jarııalanǵan «qatań» bıýdjet sharalaryna qarsy shyqty.

Uıymdastyrýshylar qatarynda FDT, CGT, FO, CFE-CGC, CFTC, Unsa, FSU jáne Solidaires kásipodaqtary bar. Olardyń músheleri 2023 jylǵy 6 maýsymda ótken zeınetaqy reformasyna qarsy sońǵy ereýilden keıin alǵash ret birlesip kóshege shyqty.

Jýrnalısterdiń paıymynsha, bul jolǵy ereýil 10 qyrkúıektegi narazylyqtan áldeqaıda aýqymdy. Tasymaldaý, densaýlyq saqtaý, bilim berý jáne ózge de salalardyń ókilderi qatysyp jatyr.

Sondaı-aq shamamen 50 adam Frantsııa Ekonomıka mınıstrligi ǵımaratyna qysqa ýaqytqa basyp kirdi. Degenmen aıtarlyqtaı shyǵyn nemese tártip buzýshylyq tirkelgen joq.

Sonymen qatar ereýilshiler eldiń birneshe joldaryn buǵattaýǵa talpynǵan. Tártipti qamtamasyz etý úshin tańǵy saǵat 4:00-den bastap 80 myńǵa jýyq polıtseı jumyldyryldy.

Frantsııa Іshki ister mınıstri zań buzýshylarǵa qatysty qatań sharalar qoldanylatynyn málimdedi. Keı óńirlerde jaǵdaıdy baqylaý úshin drondar paıdalanylǵan.

Qazirgi ýaqytta polıtsııa 94 quqyq buzýshylyq deregi boıynsha hattama jasap, 32 adamdy ustaǵan. El aýmaǵynda ІІM-niń 476 sharasy ótip jatyr, sonyń ishinde 341-i joldarda, 135-i jol jabýlarǵa qatysty. Sonymen birge 20 órt oqıǵasy tirkelgen.

Buǵan deıin Frantsııada bıýdjet qysqartýǵa qarsy jalpyulttyq ereýilge daıyndyq júrip jatqany habarlanǵan bolatyn.