Frantsııada EO-ǵa múshe emes el azamattary úshin mýzeı bıletteri qymbattady
ASTANA. KAZINFORM - Frantsııada búginnen bastap Eýropalyq odaq aýmaǵynda turaqty turmaıtyn týrıster úshin Lývr, Versal jáne ózge de mádenı nysandarǵa kirý aqysy qymbattaıdy. Bul týraly Kazinform agenttiginiń menshikti tilshisi habarlaıdy.
Eldegi birqatar iri mýzeı men tarıhı eskertkishterde EO-dan tys memleketterden kelgen azamattar úshin joǵary tarıf engizildi. Bul ózgeris qazaqstandyq týrısterge de qatysty.
Bıliktiń túsindirýinshe, mundaı dıfferentsıaldy baǵa saıasaty mádenı murany saqtaýdy qarjylandyrýdyń bir tetigi retinde usynylyp otyr. Alaıda bul bastamaǵa jergilikti kásipodaqtar qarsy shyqty.
Olardyń aıtýynsha, mundaı tájirıbe Eýropanyń ózge elderinde de, AQSh-ta da joq.
Endi eýroodaqqa kirmeıtin elderdiń azamattary álemdegi eń kóp baratyn mýzeı — Lývrǵa kirý úshin 32 eýro tóleýge tıis, bul EO turǵyndaryna arnalǵan bıletten 45 paıyzǵa qymbat. Sol sııaqty Shambor saraıyna kirý aqysy — 31 eýro, ıaǵnı eýropadan kelýshilerden 10 eýro artyq. Al Versal saraıyna bılet baǵasy sársenbiden bastap taǵy 3 eýroǵa ósedi.
Frantsııanyń Mádenıet mınıstrliginiń málimetinshe, bıyl mundaı baǵa saıasaty Konserjerı, Sent-Shapel jáne Opera Garne nysandaryna da qoldanylady.
— Men EO-ǵa kirmeıtin elderden kelgen týrısterdiń kirý bıleti úshin kóbirek tólegenin qalaımyn. Bul qosymsha qarajat ulttyq mura nysandaryn qalpyna keltirýge jumsalýy tıis. Frantsýzdar bárin óz qaltasynan tóleýge mindetti emes, — dep túsindirgen edi 2024 jyldyń sońynda mádenıet mınıstri Rashıda Datı.
Alaıda belgııalyq basylymdar bul sheshimniń Eýropa men AQSh-ta balamasy joq ekenin atap ótedi. Máselen, Londondaǵy Brıtan mýzeıi — tegin, al Amsterdamdaǵy Reıksmýzeı, Madrıdtegi Prado, Berlındegi Eski ulttyq galereıa kelýshilerdi geografııalyq shyǵý tegine qaraı bólmeıdi.
Mınıstrlik esebinshe, jańa tarıftik saıasat Frantsııaǵa jyl saıyn qosymsha 20–30 mıllıon eýro kiris ákeledi. Bul qarjy, sonyń ishinde, prezıdenttiń bastamasymen qolǵa alynǵan jáne quny 1 mıllıard eýrodan asatyn Lývrdy qaıta jańǵyrtý jobasyna baǵyttalmaq.
Eske sala keteıik, 2025 jyldyń qazan aıynda belgisiz bireýler Lývrdan Frantsııanyń tarıhı murasy sanalatyn qundy áshekeı buıymdardy urlap ketken. Urlanǵan jádigerlerdiń keıingi taǵdyry ázirge beımálim.
Aıta keteıik, Lývr - álem boıynsha adamdar eń kóp baratyn mýzeı.
Osyǵan deıin Lývr mýzeıiniń qaýipsizdik júıesine qatysty taǵy bir daý shyqqany týraly jazdyq.