Frantsııa eń tómengi jalaqyny shuǵyl ósirýdi kózdep otyr

ASTANA. KAZINFORM — Frantsııa úkimeti halyqtyń ómir súrý qunynyń ósýine qarsy jappaı narazylyq bildirýine baılanysty eń tómengi jalaqyny kóterý merzimin 2027 jylǵy qańtardan 2026 jylǵy jeltoqsanǵa aýystyrý týraly sheshim qabyldady, dep habarlaıdy Reuters.

mıtıng vo Frantsıı
Kollaj: Kazinform / II

Frantsııa premer-mınıstri Sebasten Lekornıý bul sheshimdi kásipodaqtar men jumys berýshiler birlestikteriniń ókilderimen kezdesýden keıin jarııalady.

Eńbek mınıstri Jan-Per Farandýdyń aıtýynsha, eń tómengi jalaqy 1,6 paıyz ósip, mindetti tólemder shegerilgennen keıin aıyna 1 502 eýroǵa (shamamen 755 myń teńge) jetedi. Osylaısha qazirgi 1 478 eýromen (shamamen 743 myń teńge) salystyrǵanda aılyq tabys 24 eýroǵa (shamamen 12 myń teńge) artady.

Ádette Frantsııada eń tómengi jalaqy jyl saıyn 1 qańtarda ınflıatsııa deńgeıine sáıkes ósedi. Alaıda bul joly bılik áleýmettik shıelenisti báseńdetý úshin jalaqyny kóterýdi bir aı erterek ótkizýdi uıǵarǵan.

Sońǵy aptalarda Frantsııada jappaı narazylyq sherýleri ótip jatyr. Bastapqyda mektepterdi qarjylandyrýdyń jetkiliksizdigine baılanysty bastalǵan narazylyq keıin keńeıip, basqa da máselelerge qatysty halyqtyń jappaı qarsylyǵyna ulasty.

Buǵan deıin Frantsııada jappaı narazylyq aktsııalarynyń jańa tolqynyna baılanysty 70 myń polıtseı men jandarm jumyldyrylǵany habarlanǵan bolatyn.