Frantsııada ekinshi ret jaryq óshti: dıversııa bolýy múmkin
ASTANA. KAZINFORM — Frantsııanyń Rıvera óńirinde 48 saǵat ishinde ekinshi iri elektr qýatynyń úzilýi tirkeldi. Bul joly — Nıtstsadaǵy qosalqy stantsııada jeksenbige qaraǵan túni shyqqan órtke baılanysty jaryó sóndi, dep jazdy Oxu.Az BBC-ge silteme jasap.
Aldyn ala baǵalaýǵa qaraǵanda, bul oqıǵa ádeıi jasalǵan áreket bolýy múmkin. Órt jergilikti ýaqytpen túngi saǵat 2 shamasynda shyqqan. Nátıjesinde 45 000 úı jaryqsyz qaldy.
Elektr qýatynyń úzilýi Nıtstsa áýejaıyn, tramvaı júıesin jáne jaqyn mańdaǵy Sen-Loran-dıý-Var men Kan-sıýr-Mer eldi mekenderin de qamtydy. Elektr qýaty tek tańerteń qaıta qosyldy.
Nıtstsa meri Krıstıan Estrozı bul oqıǵany qatań aıyptap, ony «elge qarsy jasalǵan qylmystyq áreket» dep atady. Al merdiń orynbasary Gael Nofrı órttiń «qylmystyq sıpaty bolýy múmkin» ekenin málimdedi. Jergilikti BAQ-tyń habarlaýynsha, polıtsııa oqıǵa ornynda dóńgelek izderin jáne buzylǵan esikterdi anyqtaǵan.
Bul oqıǵa Kann qalasynda elektr jaryǵy úzilgennen keıingi kúni boldy. Onda dál sol ýaqytta halyqaralyq kınofestıval ótip jatqan. Ol jerde de órt kúdigi bar: shamamen 160 000 úı jaryqsyz qalyp, birneshe kıno kórsetilim toqtatylǵan. Tek generatorlarǵa aýysý arqyly festıvaldi jalǵastyrý múmkin boldy.
Qazirgi tańda eki oqıǵanyń bir-birimen baılanysy bar ekeni resmı túrde rastalmaǵan.
Eske sala keteıik, buǵan deıin Frantsııada blekaýt bolyp, myńdaǵan úıler men Kann kınofestıvali jaryqsyz qalǵanyn jazǵan edik.