Frantsııada Ebola vırýsyn juqtyrýdyń alǵashqy jaǵdaıy tirkeldi
ASTANA. KAZINFORM — Frantsııada Kongo Demokratııalyq Respýblıkasyndaǵy gýmanıtarlyq mıssııadan oralǵan dárigerden Ebola vırýsy anyqtaldy bolyp shyqty, dep habarlaıdy Bild.
Frantsııa Densaýlyq saqtaý mınıstrliginiń málimetinshe, naýqasty qatań qaýipsizdik sharalaryn saqtaı otyryp aýrýhanaǵa jetkizip, oqshaýlaý bólimine jatqyzǵan. Klınıkanyń naqty ornalasqan jeri jarııalanǵan joq. Qazir bılik ókilderi naýqaspen baılanysta bolǵan adamdardy anyqtap jatyr. Olar úsh aptalyq karantınnen ótedi.
Qazirgi ýaqytta vırýstyń «Býndıbýdjıo» shtamy taralyp jatyr. Oǵan qarsy ázirge vaktsına da, arnaıy emdeý tásili de joq.
Resmı derekterge sáıkes, Kongo elinde vırýs juqtyrýdyń shamamen 1100 jaǵdaıy rastalǵan. Vırýs juqtyrý men ólim-jitim jaǵdaılarynyń basym bóligi qarýly qaqtyǵys jalǵasyp jatqan Itýrı provıntsııasynda anyqtalǵan. Qazirgi tańda syrqattan 280-ge jýyq adam kóz jumdy.
Vırýs kórshiles Ýganda eline de taraǵan. DDU málimetinshe, onda Ebola vırýsy 20 adamnan anyqtalyp, eki adam qaıtys bolǵan.
Aıta keteıik, Dúnıejúzilik densaýlyq saqtaý uıymy ótken aıda álemdik BAQ nazaryn aýdarǵan hantavırýs indeti resmı túrde 2 shildede aıaqtalýy múmkin ekenin málimdedi.
