Frantsııada Ebola vırýsyn juqtyrǵan alǵashqy naýqas tolyq jazylyp shyqty
ASTANA. KAZINFORM — Frantsııanyń Densaýlyq saqtaý mınıstri Stefanı Rıst elde Ebola vırýsy anyqtalǵan alǵashqy naýqastyń tolyq saýyǵyp ketkenin habarlady, dep habarlaıdy Euronews.
Mınıstrdiń aıtýynsha, eki ret júrgizilgen PTR-testiniń nátıjesi teris bolǵannan keıin naýqas tolyq aıyǵyp, úıine qaýipsiz túrde shyǵarylǵan.
Jazylyp shyqqan adam — gýmanıtarlyq uıymnyń dárigeri. Ol 23 maýsymda Kongo Demokratııalyq Respýblıkasynan Frantsııaǵa ushyp kelgen. Ushaqqa miner aldynda basy sál aýyrǵanymen, sapar barysynda jaǵdaıy nasharlaǵan.
Frantsııaǵa kelgen boıda dáriger oqshaýlanyp, aýrýhanaǵa jatqyzyldy. Onymen baılanysta bolǵan bes adam da 21 kún boıy úı jaǵdaıynda oqshaýlaýda boldy.
Stefanı Rıst naýqastyń aýrýdy jeńil túrde ótkergenin jáne onyń sanıtarlyq talaptarǵa tolyq sáıkes qatań medıtsınalyq baqylaýda bolǵanyn aıtty.
Ebola vırýsy gemorragııalyq qyzbany týǵyzady jáne bul dert kóbine ólimge ákelýi múmkin.
Buǵan deıin Kongo Demokratııalyq Respýblıkasynda Ebola qyzbasynyń 1406 rastalǵan jaǵdaıy tirkelip, onyń 438-i ólimmen aıaqtalǵany habarlanǵan.
Aıta ketelik Frantsııada Ebola vırýsyn juqtyrýdyń alǵashqy jaǵdaıy tirkelgen edi.
