Frantsııada bıýdjet qysqartýǵa qarsy jalpyulttyq ereýilge daıyndyq júrip jatyr

ASTANA. KAZINFORM — Frantsııada beısenbi kúni bıýdjetti qysqartýǵa qarsy narazylyq aıasynda muǵalimder, poıyz mashınısteri, farmatsevter men aýrýhana qyzmetkerleri el kóleminde jalpyulttyq ereýilge shyǵýǵa daıyndalyp jatyr, dep habarlaıdy AZERTADJ.

Kásipodaqtar úkimetten memlekettik qyzmetterge jumsalatyn shyǵyndardy kóbeıtýdi, baılarǵa salyqty arttyrýdy jáne memlekettik zeınetaqy júıesine engizilgen tanymal emes reformalardy joıýdy talap etip otyr.

Bul áleýmettik tolqýlar el prezıdenti Emmanıýel Makron men jýyrda ǵana taǵaıyndalǵan premer-mınıstr Sebasten Lekornıý tap bolǵan saıası daǵdarys jaǵdaıynda órship otyr. Sonymen qatar, úkimetke el qarjysyn baqylaýǵa alý qajettigi de qysym týǵyzyp otyr, dep jazady Reuters agenttigi.

Frantsııa Іshki ister mınıstrligindegi derekkózge silteme jasaǵan Reuters agenttigi ereýilder men sherýlerge 800 myńǵa deıin adam qatysady dep boljaýda.

— Biz ókildik etetin jumysshylar ashýly, — delingen Frantsııanyń jetekshi kásipodaqtarynyń birlesken málimdemesinde.

Olar burynǵy úkimettiń qarjylyq josparyn «qatigez» jáne «ádiletsiz» dep atady.

Ótken jyly Frantsııa bıýdjetiniń tapshylyǵy EO belgilegen 3% sheginen eki esege jýyq asyp tústi. Al Lekornıý bul tapshylyqty qysqartýǵa tyrysqanymen, oǵan parlamenttegi qoldaýdy alý úshin ózge partııalardyń kómegine júginýge týra keledi. 2026 jylǵy bıýdjet jobasyn qabyldatý ońaı bolmaıdy — bul saıası kúresti qajet etedi.

Lekornıý ótken aptada premer-mınıstr bolyp taǵaıyndalǵan edi. Buǵan deıin parlament Fransýa Baırýdy otstavkaǵa jibergen bolatyn. Ol bıýdjet shyǵyndaryn 44 mıllıard eýroǵa qysqartýdy usynǵan bolatyn.

Frantsııanyń Іshki ister mınıstri Brıýno Retaıo BFM TV telearnasyna bergen suhbatynda ereýilderge qarsy 80 myń polıtsııa men jandarm jumyldyrylatynyn aıtty.

Sondaı-aq tártipsizdikterge qarsy bólimsheler, drondar jáne bronetehnıka saqadaı saı turmaq. Retaıonyń aıtýynsha, olar nysandardy buǵattaý áreketterine jáne dıversııaǵa jol bermeý úshin qajet. Mınıstr keıbir toptar tártip saqshylarymen qaqtyǵys ornatýǵa tyrysýy múmkin ekenin de joqqa shyǵarmady.

Budan buryn Frantsııanyń jańa premer-mınıstri úkimet múshelerine beriletin «ómir boıǵy» jeńildikterdi alyp tastaýdy josparlap otyrǵanyn jazǵan edik.