Frantsııada Brıjıt Bardomen qoshtasý rásimi ótti

ASTANA. KAZINFORM — 7 qańtar kúni Frantsııanyń ataqty juldyzy Brıjıt Bardomen qoshtasý rásimi Sen-Trope qalasyndaǵy Notr-Dam-de-l’Assompson katolık shirkeýinde ótti, dep habarlaıdy Kazinform agenttiginiń menshikti tilshisi.

Bardonyń rýhyna taǵzym etý sharasy Frantsýz Rıverasyndaǵy kýrortta uıymdastyryldy. Ol aktrısalyq mansabyn aıaqtaǵannan keıin osy óńirde 50 jyldan astam ýaqyt ómir súrgen. Qoshtasý rásimine ánshiler, janýarlar quqyǵyn qorǵaýshylar jáne qoǵam qaıratkerleri, sonyń ishinde ásireońshyl kúshterdiń kóshbasshysy Marın Le Pen qatysty.

Brıjıt Bardo 2025 jylǵy 28 jeltoqsanda La-Madragtaǵy jeke vıllasynda 91 jasynda qaıtys boldy. Panıhıda aldynda onyń jubaıy Bernar d’Ormal Bardonyń qaterli isikten kóz jumǵanyn málimdedi. Degenmen ol aýrýdyń naqty túrin atamady. Paris Match basylymyna bergen suhbatynda jubaıynyń eki operatsııany «óte jaqsy» ótkergenin, soǵan qaramastan derttiń ótken aıda ony alyp ketkenin aıtty.

Brıjıt Bardo 1950 jyldary halyqaralyq deńgeıde tanymal bolyp, «Qudaı áıeldi jaratty» fılmi arqyly frantsýz kınematografııasynda tóńkeris jasaǵan aktrısa retinde tarıhta qaldy. Ol dástúrli kózqarastarǵa qarsy shyǵyp, seksýaldyq erkindiktiń sımvolyna aınaldy.

1970 jyldary Bardo akterlik qyzmetin toqtatyp, janýarlar quqyǵyn qorǵaý isine belsene aralasty. Sonymen qatar, ol saıası ómirge de qatysyp, ásireońshyl baǵyttaǵy kózqarastarymen tanyldy. Immıgratsııaǵa qatysty qatań málimdemeleri onyń ómiriniń sońǵy kezeńinde keıbir jankúıerleriniń teris kózqarasyn týdyrdy.

Jerleý rásimine Bardonyń otbasy músheleri, onyń ishinde uly Nıkolıa-Jak Sharre, frantsýz ánshileri Jan-Rosh pen Mıreı Mate, telejúrgizýshi Karolın Marjerıdon, sondaı-aq teńiz ekologııasy men janýarlar quqyǵyn qorǵaýshy kanadalyq-amerıkalyq belsendi Pol Ýotson qatysty.

Eske salsaq, ótken aıda «Máskeý kóz jasyna senbeıdi» fılminiń juldyzy Vera Alentova qaıtys bolǵanyn jazǵanbyz.