Frantsııada bolǵan órtten 110 adam zardap shekti

ASTANA. KAZINFORM – Frantsııanyń ońtústigindegi iri qalanyń mańynda bolǵan alapat órtten 110 adam jaraqat aldy. Órtti sóndirýge 700-den astam órt sóndirýshi tartyldy.

Órt Marınıan men Marsel áýejaılaryn jalǵaıtyn A552 avtomagıstralinde paıda boldy. Birneshe saǵattan soń kúnniń ystyǵy men qurǵaq shóp saldarynan órt Marseldiń soltústigine jaıyla bastady.

Qoıý tútin Foke qalasyna jetti, onda 16-shy okrýg turǵyndaryna kóshege shyqpaý týraly eskertý jasaldy.

-Tútin úıge kirmeýi úshin esik-terezelerdi myqtap bekitip, tesikterdi sýly shúberekpen bitep tastaý kerek, - dep habarlady Býsh-dıý-Ron prefektýrasy H áleýmettik jelisinde.

Jergilikti ýaqyt boıynsha saǵat 17:30-da Marselge jetken órt 700 gektardan astam aýmaqty sharpydy. Jalyn tez jaıylyp, Frantsııanyń ońtústigindegi qalanyń soltústigine qaýip tóndirdi.

Býsh-dıý-Ron departamentiniń prefekti Jorj-Fransýa Leklerk búgin materıaldyq jáne adam shyǵynyn keshendi baǵalaý júrgiziletinin málimdedi, sebebi qazirgi ýaqytta keminde 70 úıge zaqym kelgen, sonyń ishinde 10 úı tolyǵymen qıraǵan. Shamamen 110 adam jeńil jaraqat alǵany habarlandy.

Baspasóz konferentsııasy barysynda bılik ókili órttiń báseńdep kele jatqanyn aıtty.

«Alaıda ol áli tolyq baqylaýǵa alynǵan joq, jańa órt oshaqtarynyń paıda bolýy múmkin», — dedi ol.

- Júzdegen órt sóndirýshi jalynmen arpalasty. Baý-baqshalar men ormanda da kishigirim órtter paıda bolyp jatyr. Endi órtten múmkindiginshe kóp úıdi aman alyp qalý úshin kúres júrip jatyr. Bizdiń órt sóndirýshiler júzdegen úıdi qutqardy. Olar úılerdiń mańyndaǵy órtterdi sóndirýge tyrysyp jatyr. Naqtyraq qorytyndy málimetter aldaǵy saǵattarda daıyn bolady. Abyroı bolǵanda, qurban bolǵandar joq, - dedi maresl meri Benýa Paıan BFMTV efırinde.

Órtti sóndirýge 700 órt sóndirýshi jumyldyryldy, aspanda 5 bomabalýshy ushaq pen 4 Canadair ushaqtary júr.

Osyǵan deıin Frantsııada aptap ystyqtan eki adam qaza tapqany týraly jazdyq.