Frantsııada blogerler prezıdent saılaýy kezinde arnaıy erejelerdi saqtaýǵa mindetteledi

ASTANA. KAZINFORM — Frantsııanyń Arcom medıa retteýshisi 2027 jylǵy prezıdent saılaýy qarsańynda saıası plıýralızm talaptaryn iri vıdeoblogerlerge de qoldanýdy josparlap otyr. Saıası taqyrypta kontent ázirleıtin avtorlar kandıdattardy aqparattandyrý kezinde belgilengen erejelerdi saqtaýǵa mindetteledi. 

Frantsııada blogerlerge prezıdent saılaýyn jarııalaýdyń jańa talaptary qoıylady
Foto: Kazinform/JI

Euronews málimetinshe, Frantsııanyń Arcom medıa retteýshisi telearnalar men radıoǵa arnalǵan saıası plıýralızm talaptaryn alǵash ret ınternettegi iri vıdeoblogerlerge de qoldanýdy josparlap otyr.

2027 jylǵy prezıdent saılaýy kezinde olar barlyq kandıdatqa óz platformalarynda teń múmkindik berip, saılaý naýqany týraly aqparat taratqanda beıtaraptyq saqtaýǵa tıis.

Arcom basshysy Marten Ajdarıdiń aıtýynsha, keıbir vıdeoblogerlerdiń aýdıtorııasy dástúrli telearnalardyń kórermenderinen de kóp. Sondyqtan olardyń qyzmetin retteý máselesi ózekti bolyp otyr.

Jańa talaptar Frantsııa zańnamasy boıynsha suranysqa saı aýdıovızýaldy medıa sanatyna jatqyzylýy múmkin iri vıdeokanaldarǵa qoldanylady.

Mundaı arnalardy anyqtaý kezinde retteýshi olardyń qandaı taqyryptardy qozǵaıtynyn, materıaldardy qanshalyqty jıi jarııalaıtynyn, aýdıtorııasynyń kólemin jáne qoǵamdyq pikirge yqpalyn eskeredi.

Negizinen saıası jáne qoǵam úshin mańyzdy máselelerdi turaqty túrde kóteretin vıdeokanaldar qamtylady. Al tek aýdıo formatta shyǵatyn podkasttarǵa bul talaptar qoıylmaıdy.

Arcom erejelerine sáıkes, saılaý naýqanynyń bastapqy kezeńinde kandıdattarǵa sóz sóıleý úshin beriletin ýaqyt olardyń saılaýshylar arasyndaǵy boljamdy qoldaý deńgeıine saı bólinýi kerek.

2027 jylǵy 5 sáýirden bastap prezıdent saılaýynyń birinshi týryna deıin barlyq kandıdatqa óz ustanymyn tanystyrý úshin birdeı ýaqyt pen teń múmkindik berilýge tıis. Saılaýdyń birinshi týry 18 sáýirge josparlanǵan.

18 sáýirde ótetin birinshi týr men 2 mamyrǵa belgilengen ekinshi týr arasynda bul talap ekinshi kezeńge ótken eki kandıdatqa qoldanylady.

Al daýys berý qarsańynda jáne saılaý kúnderi úgit-nasıhat júrgizýge tyıym salynady.

Arcom basshysy retteýshi organ kontent avtorlarymen eń aldymen dıalog ornatýǵa basymdyq beretinin aıtty. Sonymen qatar mekeme ereje buzýshylyqtarǵa qatysty shaǵymdardy qaraıdy.

Talaptardy óreskel nemese birneshe ret buzǵandarǵa sanktsııalar qoldanylýy múmkin.

Marten Ajdarı vıdeoblogerlerdiń qyzmetin retteý mekeme úshin jańa baǵyt ekenin moıyndady. Sondyqtan Arcom bul jumysty saqtyqpen júrgizýdi kózdep otyr.

Aıta keteıik, Frantsııada ınflıýenserlerdiń jarnamalyq qyzmetin retteıtin zań 2023 jyly qabyldanǵan. Oǵan sáıkes, blogerler jarnamalyq materıaldardy ashyq kórsetýge mindetti. Sondaı-aq zańda tyıym salynǵan taýarlar men qyzmetterdi, sondaı-aq alaıaqtyq usynystardy jarnamalaǵany úshin jaýapkershilik kózdelgen.

Al jańa talaptar jarnamaǵa emes, prezıdent saılaýy kezinde saıası kózqarastardyń ártúrliligi men kandıdattarǵa teń múmkindik berilýine qatysty.

Eske salaıyq, buǵan deıin Frantsııa Konstıtýtsııasyna sáıkes, prezıdent saılaýy qazirgi memleket basshysynyń ókilettik merzimi aıaqtalýyna 20-35 kún qalǵanda ótýge tıis ekenin jazǵan edik. Birinshi týr 2027 jylǵy 18 sáýirde, ekinshi týr 2 mamyrda ótedi. Emmanıýel Makronnyń prezıdenttik ókilet merzimi 2027 jylǵy 14 mamyrda tún ortasynda aıaqtalady. Osylaısha, saılaý kúnderi Konstıtýtsııa talaptaryna tolyq sáıkes keledi.