Frantsııada bıylǵy maýsymdaǵy tórtinshi aptap ystyq bastaldy
ASTANA. KAZINFORM – Tarıhyndaǵy eń aýqymdy orman órtteri maýsymyn bastan ótkerip jatqan Frantsııada jyl basynan bergi tórtinshi aptap ystyq tolqyny bastaldy. Bul týraly Anadolý agenttigi jazdy.
Frantsııanyń Meteo-France meteorologııalyq qyzmetiniń málimetinshe, eldiń ońtústik-batysynda aýa temperatýrasy negizinen 36–38 gradýs shamasynda bolady, al jekelegen departamentterde 40 gradýstan asady.
Frantsııanyń basym bóliginde aýa temperatýrasy 32–35 gradýsqa deıin kóteriledi. Parıjde shamamen 33 gradýs ystyq bolady dep kútilip otyr.
Sınoptıkterdiń boljamynsha, aptap ystyqtyń sharyqtaý shegi erteń bolady. Soltústiktegi Mansh departamentin qospaǵanda, maýsymdaǵy tórtinshi aptap ystyq tolqynynyń áseri eldiń barlyq derlik aýmaǵynda sezilip jatyr.
Maýsym aıynyń sońy men shildeniń basynda tirkelgen aldyńǵy aptap ystyq kezinde Frantsııadaǵy ólim-jitim kórsetkishi ótken jyldardaǵy ortasha deńgeımen salystyrǵanda 36 paıyzǵa artqan.
Osy kezeńde ádettegiden 5 767 adamǵa kóp qaıtys bolǵany tirkeldi.
Sonymen qatar eldiń ońtústik-batysynda orman órtterimen kúres jalǵasyp jatyr. Mamandardyń aıtýynsha, ystyq ári qurǵaq aýa raıy órttiń odan ári taralýyna yqpal etip, qurǵaqshylyqty kúsheıtip otyr.
Eske sala ketsek, Frantsııa men Ispanııadaǵy órtten 200 myńnan astam adam evakýatsııalanǵanyn jazdyq.
Odan keıin jaǵdaı kúrt ýshyǵyp, qaýipsiz jerge kóshirilgender sany 320 myńnan asty.
Sondaı-aq aptap ystyqtan Frantsııada segiz ıadrolyq reaktordyń qýaty tómendetildi.
