Frantsııada aptap ystyqtan úsh adam kóz jumdy
ASTANA.KAZINFORM — Frantsııada buryn-sońdy bolmaǵan aptap ystyq saldarynan úsh adam qaıtys boldy. Eldiń birqatar óńirinde aýa temperatýrasy 40 °C-tan asyp, bılik aptap ystyqtyń taǵy birneshe kúnge sozylýy múmkin ekenin eskertti, dep habarlaıdy Euronews.
Kóz jumǵandardyń jasy 80 ben 95 aralyǵyndaǵy eki er adam men bir áıel. Olar jeksenbi kúni Frantsııanyń ońtústik-batysyndaǵy Bordo mańyndaǵy úılerinde kóz jumdy. Ólim jaǵdaılary Senon, Sen-Medar-an-Jal jáne Sen-Jan-d’Ilak kommýnalarynda tirkeldi. Osy kezeńde Frantsııanyń kóptegen aýmaǵynda aýa temperatýrasy 36 °C-tan asyp, keıbir eldi mekenderde 40 °C-tan joǵary boldy.
Memleket ókili Sofı Brokaniń aıtýynsha, tótenshe jaǵdaılar qyzmeti atalǵan ólim jaǵdaılaryn aldyn ala aptap ystyqpen baılanystyryp otyr. Qazirgi ystyq tolqyny aýqymy jaǵynan Eýropa tarıhyndaǵy eń joıqyn kezeńderdiń biri bolǵan 2003 jylǵy tamyzdaǵy aptappen salystyrylýda.
Frantsııanyń ulttyq meteorologııalyq qyzmeti Météo-France anomaldy ystyqtyń apta boıy saqtalatynyn eskertti. Dúısenbi men seısenbi kúnderi eldiń kóptegen óńirlerinde «erekshe joǵary» temperatýra kútilýde, al keıbir aýdandarda aýa temperatýrasy qaıtadan 40 °C-tan asýy múmkin.
Frantsııanyń Densaýlyq saqtaý mınıstrligi turǵyndardy sýdy jıi ishýge, alkogolden bas tartýǵa, úı-jaılardy salqyn ustaýǵa jáne kúnniń eń ystyq ýaqytynda dene júktemesin shekteýge shaqyrdy.
Ásirese qart adamdarǵa kúnine birneshe saǵat salqyn nemese kondıtsıoneri bar bólmede bolý, deneni dymqyl súlgimen nemese sý búrký arqyly salqyndatý jáne mıneraldyq tepe-teńdikti saqtaý úshin az mólsherde, biraq jıi tamaqtaný usynyldy.
Mınıstrlik sondaı-aq kórshiler men týystardy egde jastaǵy jáne jalǵyz turatyn adamdarmen turaqty baılanysta bolýǵa shaqyryp, aptap ystyq kezinde kúndelikti qońyraý nemese qysqa sapardyń adamnyń ómirin saqtap qalýy múmkin ekenin atap ótti.
18 maýsymnan bastap elde turǵyndarǵa ekstremaldy ystyqpen kúresýge kómektesý maqsatynda arnaıy aqparattyq «jedel jeli» jumys istep keledi.
Anomaldy ystyq Ispanııa, Ulybrıtanııa, Belgııa, Nıderland, Italııa, Shveıtsarııa jáne Germanııa elderinde de qatty sezilip otyr.
Aıta ketelik Frantsııanyń 49 aımaǵynda aptap ystyqqa baılanysty eń joǵary qaýip deńgeıi engizilgen edi.
