Frantsııada aptap ystyq saldarynan ólim-jitim myń jaǵdaıǵa artty
ASTANA. KAZINFORM – Frantsııada birneshe kúnge sozylǵan aptap ystyq saldarynan ólim-jitim kórsetkishi boljanǵan deńgeıden shamamen myń jaǵdaıǵa artty, dep habarlaıdy DW.
Frantsııanyń qoǵamdyq densaýlyq saqtaý jónindegi ulttyq agenttigi (Santé publique France) 23 maýsymnan beri táýliktik ólim-jitim kórsetkishi aıtarlyqtaı óskenin málimdedi.
«23 maýsymnan beri kún saıynǵy ólim-jitim kórsetkishi artyp keledi. Ólim sanynyń eń joǵary ósimi qaýiptiń "qyzyl" deńgeıi jarııalanǵan óńirlerde, ásirese óz úıinde qaıtys bolǵan adamdar arasynda tirkeldi», – delingen agenttik habarlamasynda.
Aldyn ala málimet boıynsha, 24 maýsymda elde barlyq sebep boıynsha 1200-den astam adam qaıtys bolǵan. Al 25 jáne 26 maýsym kúnderi bul kórsetkish 1400-den asty. Salystyrý úshin sáýir men mamyr aılarynda táýligine orta eseppen 900-1000 ólim tirkelgen.
Vedomstvonyń málimetinshe, 24 maýsymnan beri ótken aılardaǵy kórsetkishpen salystyrǵanda shamamen myńǵa jýyq artyq ólim jaǵdaıy tirkelgen.
Ólim-jitimniń ósýi Il-de-Frans, Jańa Akvıtanııa, Bretan, Ortalyq – Lýara ańǵary, Normandııa jáne Peı-de-la-Lýar óńirlerinde erekshe baıqalǵan.
Agenttik aptap ystyqtyń saldary barlyq jas sanatyna áser etkenin atap ótti. Degenmen tirkelgen ólim jaǵdaılarynyń 85 paıyzy 65 jastan asqan azamattarǵa tıesili.
28 maýsymda Frantsııanyń kóptegen óńirinde aýa temperatýrasy 40°C-tan asqan birneshe kúndik aptaptan keıin ystyq birshama báseńdedi. Météo-France málimetinshe, Parıjde aýa temperatýrasy 29°C-qa deıin tómendegen.
Aıta keteıik, Germanııada da buryn-sońdy bolmaǵan aptap ystyq tirkeldi.
