Frantsııada alǵash ret COVID-19 vırýsynyń jańa nusqasyn juqtyrýdyń 4 jaǵdaıy anyqtaldy
ASTANA. KAZINFORM – Frantsııada alǵash ret COVID-19 vırýsynyń jańa NB.1.8.1 túrin juqtyrýdyń tórt jaǵdaıy anyqtaldy, dep habarlaıdy BFMTV.
- Bul týraly birneshe el habarlaǵan. Biz olardyń birnesheýin Frantsııadan anyqtadyq. Naqtyraq aıtqanda 4 jaǵdaı aýrýhanadan jáne turǵyndar arasynan anyqtaldy, - dedi jergilikti vırýsolog Brýno Lına.
Eýropalyq aldyn alý jáne baqylaý ortalyǵy BFMTV tilshisine NB.1.8.1 shtammynyń vırýstary Germanııa, Irlandııa, Nıderland, Ispanııa men Shvetsııada anyqtalǵanyn habarlady.
Qazirgi tańda Qytaıda belsendi tarap, Azııa qurlyǵynyń keıbir bólikterinen de tabylyp jatqan NB.1.8.1 shtammy COVID-19 vırýsynyń keń taraýyna, Gonkong pen Taıvanda naýqastardyń aýrýhanaǵa túsýine sebep boldy.
Mamandardyń aıtýynsha, atalǵan vırýs asa kúrdeli emes dep sanalady, soǵan qaramastan resmı ókilder adamdar kóp shoǵyrlanatyn oryndarda maska taǵyp, vaktsına men emdeý quraldaryn kóbirek jınaý kerektigin aıtyp otyr.
Osyǵan deıin júrgizilgen zertteýler bul nusqanyń adam kletkalarymen tyǵyz baılanysyna baılanysty tez taraıtynyn kórsetti. Alaıda ol ózge shtamdarmen salystyrǵanda ımmýnıtet úshin asa qaýipti emes.
Osyǵan deıin Densaýlyq saqtaý mınıstrliginiń jyl basynan beri 51 adam koronavırýs juqtyrǵany týraly habarlaǵanyn jazǵan bolatynbyz.