Frantsııada álemdegi eń uzyn baget pisirildi
ASTANA. KAZINFORM – Frantsýz naýbaıshylary álemdegi eń uzyn bagetti pisirdi. Onyń uzyndyǵy 140 metrden asty, dep habarlaıdy CNN.
Eń uzyn baget jeksenbi kúni Parıj mańynda ornalasqan Sıýren kommýnasyndaǵy Suresnes Baguette Show kezinde pisirildi.
Bagettiń uzyndyǵy 140,53 metrdi qurady, bul Gınnestiń rekordtar kitabyna sáıkes ıtalıan naýbaıshylary bes jylǵa jýyq ýaqyt boıy ustaǵan burynǵy 132,62 metr rekordynan asyp tústi.
18 naýbaıshydan turatyn komanda qamyrdy daıyndaýdy jergilikti ýaqyt boıynsha tańǵy 3-te bastady, al pisirý protsesin tańǵy saǵat 5-ten bastap baqylady.
Pisirgennen keıin bagettiń bir bóligi kesilip, oǵan Nýtella jaǵylyp, kópshilikke taratyldy.
Qalǵan bóligi úısizderge taratylý úshin jergilikti Celije jastar birlestigine berildi.
«Sıýren bizdiń gastronomııanyń ulttyq sımvolyn jáne onyń noý-haý saqtaıtyn qolónershilerdi dáripteıtin álemdegi eń uzyn baget rekordynyń kýási bolǵanyn maqtan tutady», — dedi Sıýren meri Gııom Býdı.
Frantsýz naýbaıshylary men kondıterleri konfederatsııasynyń prezıdenti Domınık Anrakt «shamamen 10 saǵat jumys qajet bolǵanyn» jetkizdi.
Onyń aıtýynsha, «qoldan jasalǵan eń uzyn baget rekordy naǵyz ujymdyq sporttyq rýhty qajet etedi, al Olımpıada jyly barlyq qolónershilerge bravo dep aıtý kerek».
