Frantsııada adamnan Shamonda vırýsy alǵash ret anyqtaldy
ASTANA. KAZINFORM — Frantsııanyń Lıon qalasynda aýrýhanaǵa jatqyzylǵan aýyr ımmýn tapshylyǵy bar naýqas qazan aıynyń basynda kóz jumdy. Bul týraly Frantsııanyń Densaýlyq saqtaý jáne Aýyl sharýashylyǵy mınıstrlikteri málimdedi, dep habarlaıdy Kazinform agenttiginiń menshikti tilshisi.
Resmı málimdemege sáıkes, Shamonda vırýsyn juqtyrǵan alǵashqy adam tirkeldi. Buǵan deıin atalǵan vırýs adamǵa juqpaıdy dep eseptelip kelgen.
Naýqas aýyr dertke baılanysty Hospices Civils de Lyon aýrýhanasynda emdelip jatqan. Tergeýdiń aldyn ala qorytyndysyna sáıkes, onyń óliminen buryn baıqalǵan nevrologııalyq asqynýlar Shamonda ınfektsııasyna baılanysty bolýy múmkin.
Infektsııanyń negizgi sebebi — Frantsııanyń shyǵysyndaǵy Culicoides týysyna jatatyn usaq shirkeıdiń shaǵýy. 2026 jyldyń kóktemi men jazynda bul óńirdegi janýarlar arasynda vırýs taralǵan. Bılik bul ımmýnıteti nashar adamda bolǵan erekshe jaǵdaı ekenin atap ótti.
Shamonda vırýsy Orthobunyavirus týysyna, Simbu serotobyna jatady. Ol qan soratyn usaq shirkeıler arqyly taralady. Vırýstyń negizgi ıesi – iri qara mal. Sondaı-aq ol usaq kúıis qaıyratyn janýarlar men jylqylardan da anyqtalǵan.
Vırýs alǵash ret 1960 jyldardyń ortasynda Nıgerııada tirkelgen. 2026 jylǵa deıin Afrıka men Japonııada janýarlar arasynda jekelegen jaǵdaılar kezdesken. Al 2026 jyldyń jazynda vırýs Eýropada alǵash ret anyqtalyp, Germanııa, Shveıtsarııa, Frantsııa jáne basqa da elderge taralǵan. Aýrýǵa shaldyqqan sıyrlardyń qyzýy kóterilip, ishi ótken, sút berýi azaıǵan.
— Qolda bar ǵylymı derekterge súıensek, qazirgi ýaqytta bul vırýstyń jalpy halyq densaýlyǵyna qaýip tóndiretini anyqtalǵan joq, – dep málimdedi Frantsııanyń tıisti mınıstrlikteri.
Atalǵan jaǵdaı týraly Dúnıejúzilik densaýlyq saqtaý uıymy men Eýropalyq aýrýlardyń aldyn alý jáne baqylaý ortalyǵyna habar berildi.
Buǵan deıin Frantsııada Ebola vırýsyn juqtyrǵan alǵashqy naýqas tolyq jazylyp shyqqanyn habarlaǵan edik.
