Frantsııada 400 adam ustaldy: tártipsizdik kezinde 60 polıtseı jaraqat aldy
ASTANA. IKAZINFORM — Frantsııada jappaı tártipsizdikke baılanysty 400 adam ustaldy. Bul týraly búgin keshke eldiń ishki ister mınıstri Loran Nýnes málimdedi. Bul týraly Kazinform agenttiginiń menshikti tilshisi habarlady.
17 qazan, senbi kúni bolǵan tártipsizdikter kezinde 60 polıtseı jaraqat alǵan. Olardyń ekeýi es-tússiz kúıde aýrýhanaǵa jetkizilgen. Loran Nýnestiń aıtýynsha, polıtseılerdiń biri tas tósemniń bólshegimen urylǵannan jaraqat alǵan.
Mınıstr zorlyq-zombylyq áreketterine ýltrasolshyl toptardyń qatysy bar dep esepteıdi. Onyń sózinshe, júzdegen, tipti myńdaǵan adamnan quralǵan toptar eldiń ártúrli aımaǵynda polıtsııa qyzmetkerlerine jappaı shabýyl jasaǵan.
Nýnes qaýipsizdik kúshteriniń áreketi zorlyq-zombylyqqa sebep boldy degen pikirmen kelispeıdi. Sonymen qatar ol «kún áli aıaqtalǵan joq» dep eskertti.
Parıjdiń ortalyq aýdanynyń meri Arıel Veıl bolǵan oqıǵalardy «tonaý kórinisteri» dep sıpattap, mundaı jaǵdaılardy «sary jıletter» qozǵalysynyń narazylyqtary kezinde de kórmegenin aıtty.
BFMTV telearnasynyń efırinde ol buryn-sońdy mundaı aýqymdaǵy tonaý oqıǵalaryna kýá bolmaǵanyn jetkizdi.
— Keltirilgen zalal men tonaý áreketteriniń saldary óte aýyr bolady dep qaýiptenemin, — dedi ol.
Sondaı-aq qala basshysy aldaǵy saǵattarǵa alańdaýshylyq bildirdi.
— Meniń oıymsha, qazir barynsha jumylyp, jaǵdaıǵa erekshe nazar aýdarýymyz kerek, — dedi ol quqyq qorǵaý organdarynyń shamadan tys júktememen jumys istep jatqanyn aıta otyryp.
Onyń sózinshe, polıtsııa bolyp jatqan oqıǵalar tirkelgen barlyq jerge birdeı jedel jetýde úlken qıyndyqtarǵa tap bolyp otyr.
Al Lımoj qalasynyń merııasy ǵımaratynda tártipsizdik kezinde bir top adam shabýyl jasaǵannan keıin órt shyqty. Jalyn ǵımarattyń bir qanatyn sharpyp, shatyrǵa deıin jetken. Shatyrdyń tireý arqalyqtary opyrylyp ketý qaýpin tóndirip tur.
Keshki saǵat 20:00 shamasynda órt sóndirýshiler jalynnyń búkil ǵımaratqa taralýyna jol bermeý úshin jumys júrgizgen. 1883 jyly ashylǵan tarıhı ǵımarattyń sáýlettik jobasy Parıj merııasynyń úlgisinde jasalǵan.
Júzdegen adam órtti syrttan baqylap turǵan.
Frantsııa premer-mınıstri Sebastıan Lekornıý Іshki ister mınıstrliginde vedomstvoaralyq daǵdarys shtabynyń jumysyn basqardy. Onyń quramyna Ádilet mınıstri Jerald Darmanen men Іshki ister mınıstri Loran Nýnes te kirdi.
Buǵan deıin Frantsııada el kóleminde jappaı narazylyq ótip jatqanyn jazdyq.
