Frantsııada 35 kúndik jaýyn sý tasqynyna ulasty
ASTANA. KAZINFORM – Frantsııada sý tasqynyna baılanysty kúrdeli jaǵdaı qalyptasty. Sınoptıkter tórt departamentte eń joǵary qyzyl deńgeıdegi qaýip jarııalady, taǵy on eki aımaqta qyzǵylt sary deńgeı engizildi, dep habarlaıdy Euronews.
Frantsııanyń ulttyq meteorologııalyq qyzmeti — Météo-France — Jıronda, Lot-ı-Garonna, Men-ı-Lýara jáne Sharanta-Marıtım departamentterinde qyzyl deńgeıdegi eskertý kúshinde ekenin málimdedi.
Bul — halyq pen ınfraqurylymǵa qaýip tóngen kezde ǵana jarııalanatyn eń joǵary dabyl deńgeıi.
Elde 1959 jyldan beri alǵash ret jaýyn 35 kún boıy tolassyz jaýǵan. Sınoptıkter «qys mezgilindegi erekshe qubylys» dep ataǵan Storm Pedro daýyly jetkenge deıin-aq topyraq ylǵalǵa tolyq qanyǵyp, sýdy sińirmeıtin kúıge túsken. Buǵan deıin Frantsııa aýmaǵyn taǵy eki kúshti daýyl kesip ótken edi, bul sý tasqyny qaýpin odan ári kúsheıtti.
Qyzyl deńgeı jarııalanǵan tórt departamentten bólek, taǵy on eki aımaqta qyzǵylt sary deńgeı engizildi. Atlant muhıty jaǵalaýynda qaýip tek jaýynnan ǵana emes, sonymen qatar qatty jelden, bıik tolqyndardan jáne teńiz sýynyń tasýynan týyndap otyr.
Bordeaux qalasynda jaǵdaı áli de kúrdeli. Garonna ózeniniń deńgeıi turaqty túrde joǵary bolyp tur. Qala meri Per ıÝrmık sý tasqynyna qarsy jergilikti qorǵanys josparyn iske qosty. Tolysý koeffıtsıentiniń joǵary bolýy eki aýdanǵa sý kirý qaýpin arttyrdy.
🔴Maintien #VigilanceRouge #crues sur les dép. Maine-et-Loire (49), Charente-Maritime (17), Lot-et-Garonne (47) et Gironde (33).
— Vigicrues (@Vigicrues) February 19, 2026
🟠22 rivières en #VigilanceOrange et toujours 138 en #VigilanceJaune.
➡️Bulletins et prévisions sur https://t.co/gkZBt684iH et l'appli @Vigicrues. pic.twitter.com/TmXzujZUTI
Bılik shuǵyl sharalar qabyldady: jaǵalaýdaǵy bazarlar jabyldy, qaýipti aımaqtaǵy mektepter men balabaqshalarda sabaq toqtatyldy, baspanasyz adamdar úshin shuǵyl kómek pýnktteri ashyldy.
Anje qalasynda Men ózeniniń deńgeıi 2000 jylǵy tarıhı maksımýmnan asýy múmkin degen boljam bar. Qala bıligi ýaqytsha baspanasyz qalǵan turǵyndardy ornalastyrý úshin sport zaldaryn ashty.
Shalonn-sıýr-Lýar kommýnasynda kanoemen serýendeý kezinde joǵalyp ketken er adamdy izdeý jumystary júrip jatyr. Ol seısenbi keshinde ózen deńgeıi kúrt kóterilgen sátte iz-túzsiz ketken.
Al Sent qalasynda Sharanta ózeniniń deńgeıi 6,40–6,50 metrge deıin kóterilýi múmkin, bul 1982 jylǵy rekordtyq mejeden nebári 30 santımetrge tómen.
Qazirgi tańda 2 myńnan astam úı sý tasqynynan zardap shekken, olardyń jartysy tolyqtaı sý astynda qalǵan.
Aıta ketelik Frantsııaǵa «Pedro» daýyly jaqyndap keletinin jazǵan edik.