Frantsııada 15 jasqa tolmaǵan balalarǵa áleýmettik jelilerge tyıym salý jedeldetiledi

ASTANA. KAZINFORM — Frantsııa prezıdenti Emmanýel Makron 15 jasqa tolmaǵan balalardyń áleýmettik jelilerdi paıdalanýyna tyıym salýdy jedel engizý nıeti bar ekenin málimdedi. Bul týraly Euronews habarlady.

Zań jobasyn jańa oqý jyly bastalǵanǵa deıin, ıaǵnı qyrkúıek aıyna qaraı qabyldaý josparlanyp otyr.

Bastamanyń negizgi maqsaty – balalar men jasóspirimderdi tsıfrlyq platformalardyń «zııandy yqpalynan» qorǵaý.

Frantsııa basshysynyń bul sheshimi Ulybrıtanııa úkimeti jasóspirimderdiń áleýmettik jelilerdi paıdalanýyn shekteý múmkindigin qarastyryp jatqanyn málimdegennen birneshe kún ótken soń qabyldandy. Bul sharalar balalardy zııandy kontentten qorǵaý jáne ekran aldynda shamadan tys ýaqyt ótkizýdiń aldyn alý úshin usynylǵan.

Azyq-túlik qaýipsizdigi, qorshaǵan orta jáne eńbek qaýipsizdigi jónindegi ulttyq agenttiktiń (A.N.S.E.S) derekterine sáıkes, Frantsııadaǵy árbir ekinshi jasóspirim smartfondy kúnine 2–5 saǵat aralyǵynda paıdalanady. 12–17 jas aralyǵyndaǵy jastardyń shamamen 90 paıyzy ınternetke kún saıyn smartfon arqyly kirse, 58 paıyzy áleýmettik jelilerdi turaqty qoldanady.

Baıandamada áleýmettik jelilerdi shamadan tys paıdalanýdyń teris saldary atap ótilgen. Olardyń qatarynda ózin-ózi baǵalaýdyń tómendeýi, óz-ózine zııan keltirý, esirtki qoldaný jáne sýıtsıdke qatysty qaýipti kontentke tap bolý qaýpiniń artýy bar. Birqatar frantsýz otbasy jasóspirimder arasyndaǵy qaıǵyly oqıǵalardan keıin TikTok platformasyna qarsy shaǵym túsirgen. Olardyń pikirinshe, bul jaǵdaılar qaýipti kontentpen baılanysty.

Prezıdent TikTok qoldanýdyń saldaryn zertteý jónindegi komıssııanyń baıandamashysy, depýtat Lora Mıllerge zań jobasyn daıyndaǵany úshin alǵys bildirip, úkimettiń bul qujatty qoldaǵanyn aıtty.

Makronnyń aıtýynsha, tyıym 15 jasqa deıingi balalarǵa arnalǵan áleýmettik jelilerge jáne orta mektepterdegi uıaly telefondardy paıdalanýǵa qatysty bolady. Onyń sózinshe, bul – jasóspirimderge, ata-analarǵa jáne muǵalimderge túsinikti ári naqty ereje.

Zań jobasy Frantsııa Ulttyq jınalysynda alǵashqy oqylymda 26 qańtarda qaralady.

Aıta keteıik, Aýstralııa álemde alǵash bolyp balalarǵa áleýmettik jelilerdi paıdalanýǵa tyıym salǵan el atandy.