Frantsııada 15 jasqa tolmaǵan balalarǵa áleýmettik jelige tyıym salý Konstıtýtsııaǵa qaıshy dep tanyldy
ASTANA. KAZINFORM – Frantsııanyń Konstıtýtsııalyq keńesi 15 jasqa tolmaǵan balalarǵa áleýmettik jelilerdi paıdalanýǵa tyıym salatyn zańdy Konstıtýtsııaǵa qaıshy dep tanydy. El Parlamenti qujatty shilde aıynda maquldaǵan bolatyn, al Prezıdent Emmanıýel Makron shekteýdi qyrkúıekten bastap engizýdi josparlaǵan edi, dep habarlaıdy BBC.
Frantsııanyń Konstıtýtsııalyq keńesi jańa zań 15 jasqa tolmaǵan balalardyń pikir bildirý jáne qarym-qatynas jasaý erkindigin shekten tys shekteıdi degen sheshimge keldi.
– Mundaı shekteýler oryndy da, qajetti de, proportsıonaldy da emes, – delingen Konstıtýtsııalyq keńes sheshiminde.
AFP málimetinshe, Konstıtýtsııalyq keńestiń sheshiminen keıin Elıseı saraıy Emmanıýel Makronnyń Premer-mınıstr Sebasten Lekornıýge qysqa merzim ishinde jańa, «zańdyq turǵydan senimdi» zań jobasyn ázirleýdi tapsyrǵanyn habarlady.
Prezıdent ákimshiligi Makronnyń balalardyń áleýmettik jelilerdi paıdalanýyna tyıym salý nıetinen bas tartpaǵanyn málimdedi.
Shilde aıynda Frantsııa Senaty men Ulttyq jınalysy qabyldaǵan zańǵa sáıkes, kelesi jyldyń qańtarynan bastap 15 jasqa tolmaǵandarǵa áleýmettik jelilerdi paıdalanýǵa tyıym salynýy tıis edi.
Tanymal áleýmettik jelilerdiń kópshiligi qazir 13 jastan bastap tirkelýge múmkindik beredi. Alaıda kámeletke tolmaǵan paıdalanýshylar úshin qarym-qatynas jasaýǵa, jańa baılanystar ornatýǵa jáne qoljetimdi kontentke qatysty qosymsha shekteýler qarastyrylǵan.
Jospar boıynsha bıyl qyrkúıekten bastap jańa akkaýnt ashqan paıdalanýshylar jasyn rastaýǵa tıis bolatyn. Al qańtardan bastap Frantsııanyń árbir turǵyny áleýmettik jelilerdi paıdalaný úshin 15 jastan asqanyn rastaýy kerek edi.
Paıdalanýshylardyń jasyn tekserýdi platformalardyń ózderi Frantsııanyń derbes derekterdi qorǵaý jónindegi retteýshisi maquldaǵan quraldar arqyly júrgizýi tıis bolǵan.
Aıta keteıik, Japonııa saılaý kezinde áleýmettik jelilerdi paıdalaný talaptaryn kúsheıtti.
