Frantsııada 15 jasqa deıingi balalarǵa áleýmettik jelini paıdalanýǵa tyıym salyndy
ASTANA. KAZINFORM — Frantsııa Eýropada alǵash bolyp 15 jasqa tolmaǵan balalarǵa áleýmettik jelilerdi paıdalanýǵa tyıym saldy. Eldiń parlamenti tyıym salatyn zańdy túpkilikti qabyldady, dep habarlaıdy DW.
Jańa ereje 1 qyrkúıekten bastap kúshine enedi.
Osylaısha Frantsııa Eýropada mundaı tyıymdy engizgen alǵashqy memleket atandy. Bılik bul sheshimniń maqsaty kámeletke tolmaǵandardy barynsha qorǵaý jáne áleýmettik jelilerdi paıdalanýǵa baılanysty qaýip-qaterdi azaıtý ekenin málimdedi.
Jasandy ıntellekt máseleleri jónindegi mınıstr Ann Le Enanfftyń aıtýynsha, el Eýropada alǵash bolyp «tsıfrlyq kámeletke tolý jasyn» engizip otyr. Buǵan deıin osyndaı shekteý Avstralııada qabyldanyp, onda 16 jasqa tolmaǵandarǵa áleýmettik jelilerdi paıdalanýǵa tyıym salynǵan bolatyn.
Zańǵa sáıkes, 1 qyrkúıekten bastap 15 jasqa tolmaǵan balalar áleýmettik jelilerde jańa akkaýnt asha almaıdy. Al buǵan deıin tirkelgen akkaýnttardy platformalar zań kúshine engennen keıin 4 aı ishinde joıýǵa mindetti.
Sondaı-aq qujat áleýmettik jelilerdi Frantsııanyń derbes derekterdi qorǵaý jónindegi retteýshi organynyń talaptaryna saı keletin jasty tekserý júıesin engizýge mindetteıdi. Buǵan deıin platformalar mundaı shekteýlerdi synǵa alǵanymen, ulttyq zańnama talaptaryn oryndaıtyndaryn málimdedi.
Buǵan deıin Ázerbaıjanda 16 jasqa tolmaǵan balalarǵa áleýmettik jelige tirkelýge tyıym salynǵan bolatyn.
