Frantsııada 11 tamyzdan bastap kelisimsiz jarnamalyq qońyraýlarǵa tyıym salynady
ASTANA. KAZINFORM – 11 tamyzdan bastap Frantsııada azamattyń aldyn ala kelisiminsiz jarnamalyq qońyraý shalýǵa tyıym salynady. Bul týraly Euronews habarlady.
Jańa talaptarǵa sáıkes, kompanııalar áleýetti klıentke tek onyń aldyn ala kelisimi bolǵan jaǵdaıda ǵana habarlasa alady. Sonymen qatar azamat kez kelgen ýaqytta mundaı kelisimin qaıtaryp alýǵa quqyly.
Frantsııa bıliginiń málimetinshe, sońǵy jyldary qabyldanǵan shekteýlerge qaramastan, telefon arqyly jasalatyn jarnamalyq qońyraýlar elde áli de ózekti másele bolyp otyr. Sondyqtan Prezıdent Emmanıýel Makronnyń úkimeti bul talaptardy qatańdatý týraly sheshim qabyldaǵan.
Zańda tek eki erekshelik qarastyrylǵan. Birinshisi – eger azamat taýar satyp alý, saıtqa tirkelý, saýalnama toltyrý nemese dúkenge barý kezinde jarnamalyq qońyraýlarǵa kelisim bergen bolsa. Ekinshisi – eger qońyraý kompanııa men tutynýshy arasyndaǵy qoldanystaǵy shartqa qatysty bolsa.
«Frantsııa bıliginiń baǵalaýynsha, el turǵyndarynyń shamamen 75%-y aptasyna keminde bir ret qajetsiz jarnamalyq qońyraý alady, al kóptegen azamat mundaı qońyraýlarǵa budan da jıi tap bolady», – dep jazdy Euronews.
2024 jyly Frantsııadaǵy tutynýshylardyń quqyqtaryn qorǵaıtyn 11 uıym mundaı qońyraýlarǵa tolyq tyıym salýdy talap etken bolatyn. Olar uıaly jáne statsıonarlyq telefondarǵa úzdiksiz qońyraý shalý mıllıondaǵan adamnyń kúndelikti ómiriniń bir bóligine aınalǵanyn málimdegen.
Jańa talaptardy buzǵany úshin iri kólemde aıyppul qarastyrylǵan. Jeke tulǵalarǵa – 75 myń eýroǵa deıin, al kompanııalarǵa 375 myń eýroǵa deıin aıyppul salynady.
Mundaı shekteýler Germanııada 2009 jyldan beri qoldanysta. Nıderlandta kompanııalarǵa óz klıentterine de olardyń kelisiminsiz jarnamalyq usynystarmen qońyraý shalýǵa tyıym salynǵan. Sondaı-aq AQSh, Kanada jáne Ulybrıtanııada da telefon marketınginen bas tartý júıeleri jumys isteıdi.
Aıta keteıik, Qazaqstanda da kompanııalardan keletin qońyraýlardy arnaıy tańbalaý máselesi qarastyrylyp jatyr.
