Frantsııa jasandy ıntellekt sektoryna 109 mlrd eýro jeke ınvestıtsııa tartýdy kózdep otyr
ASTANA. KAZINFORM – Bul týraly 10-11 aqpanda Parıjde ótetin jasandy ıntellekt (JI) máseleleri jónindegi sammıt qarsańynda Frantsııa prezıdenti Emmanıýel Makron málimdedi, dep habarlaıdy Kazinform menshikti tilshisi.
Aıtýly sharaǵa memleket jáne úkimet basshylary, halyqaralyq uıymdardyń jetekshileri, iri jáne shaǵyn kompanııalardyń basshylary, akademııalyq orta, úkimettik emes uıymdardyń ókilderi, mádenıet qaıratkerleri men azamattyq qoǵam ókilderi jınaldy.
Joǵary mártebeli qonaqtar arasynda Úndistan premer-mınıstri Narendra Modı, AQSh vıtse-prezıdenti Djeı Dı Vens jáne Eýropalyq komıssııa prezıdenti Ýrsýla fon der Lıaıen bar.
Djeı Dı Vens pen Ýrsýla fon der Lıaıenniń sóz sóıleýi seısenbige josparlanǵan.
Sammıttiń kún tártibinde JI qaýipsiz damýy, onyń qoǵamǵa áseri jáne JI tehnologııalarynyń gýmanıstik qundylyqtarǵa sáıkes kelýi jáne qoǵam múddelerine qyzmet etýin qamtamasyz etý strategııalary týraly talqylaýlar bar. Negizgi taqyryptarǵa jumys oryndaryn qurý, mádenı áser jáne ekologııalyq turaqtylyq kiredi.
Frantsııa prezıdenti Emmanıýel Makronnyń aldaǵy jyldary Frantsııadaǵy JI sektoryna shamamen 109 mlrd eýro jeke ınvestıtsııa tartatyny týraly jarııalaýy negizgi málimdeme boldy. Bul ınvestıtsııa JI úshin jahandyq jarysta Eýropanyń pozıtsııasyn nyǵaıtýǵa baǵyttalǵan.
Budan bólek, Frantsııa men BAÁ 30 mlrd dollardan 50 mlrd dollarǵa deıingi ınvestıtsııany qamtıtyn 1 gıgavattyq derekter ortalyǵyn salý týraly kelisti.
Sammıt sonymen qatar JI damytýdaǵy halyqaralyq yntymaqtastyqtyń mańyzdylyǵyn kórsetedi, etıkalyq standarttar men elder arasyndaǵy ortaq qundylyqtardyń qajettiligine nazar aýdartady. Pikirtalas barysynda JI salasyndaǵy kóshbasshylyq «batys, lıberaldy, demokratııalyq» elderdiń róli kórsetilip, bul rette Qytaı sııaqty elderdiń yqpalyna saqtyqpen qaraý qajettigi atap ótildi.
Bul rette tanymal amerıkalyq kásipker Ilon Mask Parıjde ótetin jasandy ıntellekt sammıtine qatysýdy josparlap otyrǵan joq.
Tehnologııalyq mıllıarder X-tegi efırde «Vashıngtondaǵy mańyzdy jumystarǵa baılanysty» qoly bosamaıtyndyqtan qatysa almaıtynyn aıtyp, biraq beıne rejım arqyly qatysýdy usyndy.