Frantsııa: jahandyq jylyný eńbek zańnamasyn ózgertip otyr

ASTANA. KAZINFORM – Frantsııanyń jazǵy aptap ystyq kún raıy endi tehnıkalyq jumyssyzdyqtyń sebebi bolyp sanalady. Sondyqtan qurylystaǵy jumysshylar jumysyn májbúrli túrde toqtatqan jaǵdaıda jalaqysyn joǵaltpaıdy, dep habarlaıdy Euronews. 

Frantsııada jaz mezgili jyldan jylǵa ystyq bolýda. Kóptegen adamdarǵa bul ońaı emes, ashyq aýada jumys isteýge týra keletinder úshin tipti qıyn. Jaqynda el bıligi jumys berýshiler qatty ystyq bolǵan jaǵdaıda qurylys jumystaryn toqtata alady degen jarlyq qabyldady.

«Bul óte úlken másele, óıtkeni jazataıym oqıǵalar oryn alǵan. Biz olardy boldyrmaýǵa tyrysyp kelemiz», — dedi qurylys alańyndaǵy qaýipsizdikke jaýapty qyzmetker Ýgo Pastorello.

Eldegi jazǵy aptap ystyq tolqyndary endi tehnıkalyq jumyssyzdyqtyń sebebi bolyp sanalady. Sondyqtan qurylystaǵy jumysshylar jumysyn májbúrli túrde toqtatqan jaǵdaıda jalaqysynan aıyrylmaıdy.

«Biz nysanǵa kúndiz kelip, jumys isteý úshin tym ystyq ekenine kóz jetkizýimiz, sodan keıin biz jumysshylardy úıge jiberýimiz kerek. Biraq olar jumys istegendeı jalaqy alady», — dedi Ý.Pastorello.

Eńbek zańnamasyndaǵy mundaı ózgeris ázirge tek qurylys sektoryna qatysty. 

«Jumysshylardyń, barlyǵynyń densaýlyǵyn jaqsartý mańyzdy. Men jaspyn, biraq menen úlken adamdar bar shyǵar jáne olarǵa qıynyraq», — dedi qurylysshy Dıego Bernardo.

Zertteýge sáıkes, aýanyń temperatýrasy 32 gradýstan joǵary bolǵan kezde eńbek ónimdiligi 40% tómendeıdi.