Frantsııa Ulttyq jınalysy «Qara kodekstiń» kúshin joıýdy maquldady
ASTANA. KAZINFORM – Frantsııa Ulttyq jınalysy beısenbi kúni 1685 jyly korol XIV Lıýdovık qol qoıǵan jáne Frantsııanyń barlyq otarlaryndaǵy quldardyń ómirin rettegen «Qara kodekstiń» (Code noir) kúshin joıý týraly zań jobasyn maquldady, dep habarlaıdy Euronews.
Frantsııa qul ıelený aýqymy boıynsha Eýropada Ulybrıtanııa men Portýgalııadan keıingi úshinshi memleket bolǵan.
– Frantsııa quldyqty 1794 jyly Frantsýz revolıýtsııasy kezinde joıdy. Alaıda 1802 jyly Napoleon Bonapart ony qaıta qalpyna keltirý úshin Gvadelýpaǵa ásker jiberýge buıryq berdi. Keıin el quldyqty 1848 jyly qaıtadan joıdy, – dep jazdy basylym.
2001 jyly Frantsııa quldyq pen qul saýdasyn «adamzatqa qarsy qylmys» dep tanydy (Tobıra zańy).
– Degenmen XVII–XVIII ǵasyrlarda qabyldanǵan, otarlardaǵy qulǵa aınaldyrylǵan adamdardyń quqyqtyq mártebesin belgilegen jáne «Qara kodeks» degen ataýmen belgili birqatar koroldik jarlyqtardyń kúshi resmı túrde eshqashan joıylǵan joq. Beısenbi kúni depýtattar koroldik edıkterdiń kúshin joıý týraly zań jobasyn maquldaǵannan keıin, qujatty endi Senat qaraýy tıis. Daýys berý kúni ázirge belgilenbegen. Osydan keıin zań túpkilikti qabyldanýy múmkin, – dep jazdy basylym.
Keler jyly prezıdenttik eki merziminiń aıaqtalýyna baılanysty qyzmetinen ketetin Frantsııa prezıdenti Emmanıýel Makron ótken aptada atalǵan zańdardyń kúshin joıý bastamasyn qoldaǵan edi.
Eske sala ketsek, Frantsııanyń Ádilet mınıstri Jerald Darmanen elge keletin mıgratsııany úsh jylǵa ýaqytsha toqtatýdy usynǵanyn jazdyq.
