Frantsııa túrmelerinde adam sany buryn-sońdy bolmaǵan deńgeıge jetti
ASTANA. KAZINFORM — Bıyl 1 qazanda Frantsııa túrmelerindegi sottalǵandar sany 90 937 adamǵa jetip, tarıhı rekord jańartty, dep habarlaıdy Kazinform agenttiginiń menshikti tilshisi Le Parisien basylymyna silteme jasap.
Frantsııa Ádilet mınıstrliginiń málimetinshe, bir jylda túrmedegiler sany 7,2 paıyzǵa artqan. 2025 jylǵy 1 qazanda olardyń sany 84 862 adamdy quraǵan. Al túzeý mekemelerindegi oryn sany nebári 1,5 paıyz ósip, 63 452-ge jetti.
Frantsııa túrmelerindegi oryn tapshylyǵy 43,3 paıyzǵa jetken, ıaǵnı mekemelerdegi adam sany belgilengen oryn sanynan edáýir kóp. Ásirese qysqa merzimge sottalǵandar men tergeý ızolıatoryndaǵy kúdiktiler ustalatyn ýaqytsha qamaý oryndarynda jaǵdaı kúrdeli. Ondaǵy júkteme 178 paıyzdy quraıdy. Tósek jetispegendikten, 8 959 adam edenge tóselgen matrasta uıyqtaýǵa májbúr. Olardyń sany bir jylda 52 paıyzǵa artqan.
Le Parisien basylymy Frantsııa túrmelerindegi shamadan tys adam sanyn áli de sheshimin tappaǵan másele retinde atap ótti. Al Eýropa Keńesi buǵan deıingi baıandamasynda eldegi túzeý mekemeleri «adamdar qoımasyna» aınalý qaýpi baryn eskertken.
Frantsııa Ádilet mınıstrligi túrmelerdegi oryn tapshylyǵyn azaıtý úshin modýldik túrmeler salýdy josparlap otyr. Joba aıasynda qosymsha 3 myń oryn ashý kózdelgen. Onyń jartysy aldaǵy birneshe jylda daıyn bolady.
Degenmen 2018 jylǵy ulttyq jospar boıynsha qarastyrylǵan 15 myń orynnyń 2026 jylǵy qazan aıynyń ortasyna deıin 8 myńnan sál astamy ǵana iske qosylǵan.
Eýropa Keńesiniń 2025 jylǵy derekterine sáıkes, Frantsııa túrmelerindegi tutqyndar sanynyń tyǵyzdyǵy eń joǵary elderdiń qataryna kiredi.
Buǵan deıin Grýzııanyń úsh túrmesinde tutqyndar sany shamadan tys artqanyn habarlaǵan edik.
