Frantsııa tártipsizdikke shaqyrǵan jazbalardy óshirmeıtin áleýmettik jelilerdi buǵattamaq
ASTANA. KAZINFORM — Frantsııa úkimeti bıliktiń talabynan keıin búlik pen zorlyq-zombylyqqa shaqyratyn jarııalanymdardy óshirmegen áleýmettik jelilerdi buǵattaýdy kózdep otyr, dep habarlaıdy TASS.
Usynylyp otyrǵan bastamaǵa sáıkes, ınternet-platformalar lańkestik áreketterge, kóteriliske nemese memleketke, sondaı-aq halyqtyń jekelegen toptaryna qarsy qarýly kúreske shaqyratyn materıaldardy bir saǵat ishinde óshirýge mindetteledi. Talap oryndalmaǵan jaǵdaıda bılik áleýmettik jelilerdi buǵattaýǵa nemese olardy izdeý júıeleriniń nátıjelerinen alyp tastaýǵa qol jetkize alady.
Túzetý ınternettegi zańsyz kontentti anyqtaýmen aınalysatyn Pharos memlekettik platformasynyń ókilettigin keńeıtýdi de qarastyrady. Sonymen qatar áleýmettik jelilerge kisi óltirýge, zorlyq-zombylyqqa, urlyqqa jáne múlikti joıýǵa shaqyratyn jazbalardy 24 saǵat ishinde óshirý mindetin júkteý usynylǵan. Bul talap qoǵamdyq tártiptiń eleýli buzylýyna ákep soǵýy múmkin materıaldarǵa qatysty qoldanylady.
Bastama 17 qazandaǵy narazylyq aktsııalary kezinde bolǵan jappaı tártipsizdikterden keıin ázirlengen. Dúısenbi kúni Frantsııa prezıdenti Emmanıýel Makron Marsel qalasyna sapary barysynda áleýmettik jeliler shabýyldar men tonaý oqıǵalary bolǵan jerlerde adamdardy jınaý jáne olardyń áreketterin úılestirý úshin paıdalanylǵanyn málimdedi.
Buǵan deıin Frantsııa prezıdenti Emmanıýel Makron narazylyq aktsııalary kezinde bolǵan jappaı tártipsizdikterden soń Marsel qalasyna baratynyn habarladyq.
