Frantsııa SІM: Eýrokomıssııanyń «Beıbitshilik keńesi» otyrysyna qatysýǵa mandaty joq

ASTANA. KAZINFORM — Frantsııanyń Syrtqy ister mınıstrligi beısenbi kúni AQSh Prezıdenti Donald Tramp atynan uıymdastyrylǵan «Beıbitshilik keńesi» otyrysyna Eýropalyq komıssııanyń qatysqany týraly aqparatqa baılanysty tańdanysyn bildirdi, dep habarlaıdy Sınhýa.

Vedomstvo málim etkendeı, Eýropalyq keńes Eýropalyq komıssııany osy sharaǵa qatysýǵa ýákiletteme bermegen.

Frantsııa SІM-niń resmı ókili Paskal Konfavre «Beıbitshilik keńesi» Gazadaǵy jaǵdaıǵa nazar aýdarýy tıis ekenin atap ótti. Dıplomat Frantsııa bul mehanızmniń mandaty men qyzmet aıasynda belgisizdik saqtalǵansha qatyspaıtynyn jetkizdi.

Paskal Konfavre EK ókiliniń «Beıbitshilik keńesi» otyrysyna qatysqany týraly habarlamany «tańqalarlyq» dep baǵalap, Eýropalyq komıssııanyń Eýropalyq komıssııanyń osy otyrysqa qatysýǵa mandaty joq ekenin basa aıtty. Ol AQSh-tan oralǵannan keıin EK-dan osy másele boıynsha túsinikteme berýdi kútetinin aıtty.

Donald Tramp beısenbi kúni Vashıngtonda «Beıbitshilik keńesiniń» alǵashqy otyrysyn ótkizdi.

AQSh Prezıdenti resmı túrde «Beıbitshilik keńesin» 22 qańtarda Shveıtsarııanyń Davos qalasynda ótken Dúnıejúzilik ekonomıkalyq forým kezinde onyń jarǵysyna qol qoıý rásiminde jarııalaǵan bolatyn. Keıbir iri elder men AQSh-tyń dástúrli odaqtastary bul bastamaǵa qosylýdan bas tartty.

Aıta keteıik, Prezıdent Qasym-Jomart Toqaev Beıbitshilik keńesiniń alǵashqy otyrysynda sóz sóıledi. Toqaev Beıbitshilik keńesi kópjaqty kúsh-jigerdiń áleýetin arttyratyn, zaman talabyna saı uıym ekenin alǵa tartty.

Shara barysynda Donald Tramp Qazaqstandy keremet ári baı el retinde sıpattady.

Al Toqaev Prezıdent Tramp atyndaǵy arnaıy nagradany bekitýdi usyndy.