Frantsııa Syrtqy ister mınıstrligi Marseldegi Reseı konsýldyǵy mańynda bolǵan jarylysqa túsinik berdi

ASTANA.KAZINFORM - Frantsııa Syrtqy ister mınıstrligi dúısenbi kúni tańerteń Reseıdiń Marseldegi bas konsýldyǵyna jasalǵan shabýyldy aıyptady, dep habarlaıdy Kazinform.

Bul týraly vedomstvonyń baspasóz qyzmeti TASS agenttiginiń suranysyna jaýap retinde málimdedi.

- Frantsııa dıplomatııalyq ókildikterdiń qaýipsizdigine jasalǵan kez kelgen shabýyldy aıyptaıdy, - dep habarlady respýblıkanyń Syrtqy ister mınıstrligi.

Vedomstvo barlyq dıplomatııalyq ókildikterdiń Vena konventsııalary boıynsha dıplomatııalyq jáne konsýldyq qatynastarǵa sáıkes qorǵalatynyn atap ótti, «Frantsııa olardy tolyq kólemde oryndaýǵa berik nıetti».

- Dıplomatııalyq jáne konsýldyq ǵımarattar men olardyń personaldarynyń qaýipsizdigi jáne tutastyǵy halyqaralyq quqyqtyń negizgi erejelerine jatady, - dep qosty mınıstrliktiń baspasóz qyzmeti.

Dúısenbi kúni, 24 aqpanda tańerteń  Frantsııadaǵy Reseı konsýldyǵy janynda jarylys bolǵan edi. Biraq ǵımaratqa zaqym keltirilmedi. Zardap shekkender joq.

Konsýldyq 8-shi aýdandaǵy Ambrýaz-Pare aýmaǵynda ornalasqan. Okrýgte basqa da konsýldyqtar, sonyń ishinde Egıpet, Týnıs, Armenııa, San-Tome men Prınsıpı konsýldyqtary bar. Oqıǵa ornynda otyzǵa jýyq órt sóndirýshi men polıtsııa qyzmetkeri bar.

Oqıǵa ornynan urlanǵan kólik tabyldy.