Frantsııa Shein men Temu taýarlaryna €20-ǵa deıin alym engizdi
ASTANA. KAZINFORM — Eýropalyq Odaq shilde aıynda usaq sálemdemelerge 3 eýro kóleminde jeke alym engizgennen keıin Qytaıdan keletin shaǵyn sálemdemeler ımporty 40 paıyzǵa deıin qysqarǵan, dep habarlaıdy Euronews.
Frantsııa ýltra jyldam sán ındýstrııasyna qatysty talaptardy kúsheıtip, jańa alym engizip jatyr. Ýaqyt óte kele onyń mólsheri kıimniń bir danasyna shamamen 20 eýroǵa deıin jetýi múmkin.
1 qyrkúıekten bastap kúshine enetin jańa alym iri elektrondyq saýda platformalaryna, sonyń ishinde Shein kompanııasyna baǵyttalǵan.
Bul shara Frantsııa parlamenti maýsym aıynda eń tómen baǵamen sapasy tómen kıimderdi orasan zor kólemde satýmen tanymal kompanııalardyń qyzmetin retteý týraly zań qabyldaǵannan keıin engizildi.
Jańa talaptar Azııanyń onlaın-saýda alpaýyttary — Shein, Temu jáne AliExpress kompanııalarynyń qyzmetin shekteýge baǵyttalǵan sharalardyń bir bóligi. Sońǵy jyldary olardyń Frantsııadaǵy tanymaldyǵy aıtarlyqtaı artqan.
— Ýltra jyldam sán ındýstrııasynyń qorshaǵan ortaǵa jáne ekonomıkamyzǵa zııandy áseri jaqsy belgili ári qujattalǵan, — dedi Ekologııalyq transformatsııa mınıstri Mate Lefevr 28 tamyz, juma kúni sharanyń egjeı-tegjeıi jarııalanǵan kezde.
Frantsııada ýltra jyldam sánge salynatyn alym qalaı esepteledi?
Zańǵa sáıkes, taýardyń ýltra jyldam sán sanatyna jatatyny eki krıterıı boıynsha anyqtalady. Olar — naryqqa shyǵarylatyn kıim kólemi jáne kıimdi jóndeý qunynyń onyń satyp alý baǵasyna qatynasy.
Ár taýarǵa salynatyn alym mólsheri osy eki krıterıı boıynsha naqty ónimniń jınaǵan kórsetkishterine qaraı belgilengen shkala boıynsha esepteledi.
Mysaly, 2026 jyly ýltra jyldam sán sanatyna jatqyzylǵan árbir ish kıimge 50 eýrotsent, fýtbolkaǵa 2 eýro, djınsyǵa 9 eýro jáne kúrteshege 12 eýro kóleminde alym salynady.
2030 jylǵa qaraı alym mólsheri bir taýarǵa 19,50 eýroǵa deıin jetýi múmkin. Alaıda onyń eń joǵary shegi taýardyń salyq salynǵanǵa deıingi baǵasynyń 50 paıyzynan aspaýy tıis.
Lefevr basqaratyn vedomstvonyń málimetinshe, qazir kompanııalardyń óz esepterine ǵana súıenbeı, derekterdi táýelsiz túrde jınaýǵa múmkindik beretin arnaıy qural ázirlenip jatyr.
Dúısenbi kúni Gonkong qor bırjasynda kópten kútken alǵashqy jarııa aktsııa ornalastyrýy (IPO) aıasynda Shein kompanııasynyń naryqtyq baǵasy 26,3 mlrd dollardy (22,7 mlrd eýro) qurady. Kompanııa AFP agenttiginiń bul sharaǵa qatysty saýalyna jaýap berýden bas tartty.
Temu men AliExpress ókilderi de sharaǵa qatysty pikir bildirý týraly ótinishke birden jaýap bermedi.
Eýropalyq bólshek saýda kompanııalary alymnan bosatyla ma?
Jańa sharanyń naqty qaı saýda kompanııalaryna qatysty bolatyny synǵa ushyrady.
Shilde aıynda Lefevr basqaratyn vedomstvo H& M nemese Zara sııaqty saýda jelilerine jańa alym salynbaıtynyn málimdegen bolatyn. Keıbir sarapshylar muny eýropalyq jáne frantsýz kompanııalarynyń jańa qarjylyq júktemeden is júzinde bosatylýy dep baǵalady.
Frantsýz bıligi Shein, Temu jáne AliExpress kompanııalary ýltra jyldam sán ındýstrııasynyń qarqyndy ósýine negizgi sebep bolyp otyrǵanyn birneshe ret málimdedi.
Eýropalyq komıssııa da bul zańnyń Eýropalyq Odaq quqyǵyna sáıkestigine qatysty suraq qoıǵan. Alaıda Lefevr basqaratyn vedomstvonyń málimetinshe, bul alańdaýshylyqtar «joıylǵan» jáne sharanyń kúshine enýine tosqaýyl qoıylady dep kútilmeıdi.
Al Qytaı shilde aıynda Frantsııa qabyldaǵan zańǵa baılanysty jaýap sharalaryn qoldanýy múmkin ekenin eskertti. Beıjiń bul rette jańa retteýdi «kemsitýshilik» dep atap, onyń saýda qaǵıdattaryn buzatynyn málimdedi.
Osydan buryn bıyl mamyr aıynda Eýropalyq Odaq qytaılyq marketpleıs Temu-ǵa tsıfrlyq saýda erejelerin buzǵany jáne EO aýmaǵynda qaýipti taýarlar taratqany úshin 200 mln eýro aıyppul saldy.
