Frantsııa Rýandanyń burynǵy birinshi hanymyna qatysty genotsıd isin qaıta qozǵady
ASTANA. KAZINFORM — 1994 jylǵy Rýandadaǵy genotsıd isi boıynsha Frantsııa Rýandanyń burynǵy birinshi hanymy Agata Habıarımananyń qyrǵynǵa qatysy bolýy múmkin degen kúdikke baılanysty tergeýdi qaıta bastady. Bul qyrǵynda shamamen 800 myń adam, negizinen týtsı halqynyń ókilderi qaza tapqan, dep habarlaıdy France24.
Ótken jyly Rýandanyń burynǵy prezıdentiniń jesirine qatysty is «dálelderdiń jetkiliksizdigine» baılanysty jabylǵan bolatyn. Alaıda sársenbi kúni Frantsııanyń apellıatsııalyq soty bul sheshimniń kúshin joıyp, tergeýdi jalǵastyrýǵa mindettedi.
83 jastaǵy Agata Habıarımana 1998 jyldan beri Frantsııada turyp keledi. Kıgalı bıligi ony birneshe ret ekstradıtsııalaýdy talap etken.
Burynǵy birinshi hanym 1994 jyldyń sáýirinde kúıeýi — Rýanda prezıdenti Jıývenalıa Habıarımana mingen ushaq atyp túsirilgennen keıin birneshe kún ótken soń frantsýz bıliginiń kómegimen Rýandadan qashyp ketken. Bul oqıǵa XX ǵasyrdaǵy eń sumdyq jappaı qyrǵyndardyń biri retinde tarıhta qalǵan genotsıdtiń bastalýyna túrtki boldy.
Habıarımananyń ózi barlyq aıyptaýdy joqqa shyǵaryp, ózin saıasatqa qatysy joq, segiz balanyń anasy ári qarapaıym úı sharýasyndaǵy áıel retinde sıpattaıdy.
Ámbebap ıýrısdıktsııa qaǵıdatyna — ıaǵnı aýyr qylmystardy olardyń qaı jerde jasalǵanyna qaramastan qýdalaý quqyǵyna — súıengen frantsýz sottary buǵan deıin de 1994 jylǵy genotsıdke qatysy bar birneshe Rýanda azamatyna aıyptaý úkimderin shyǵarǵan.
Buǵan deıin Frantsııada penıtentsıarlyq mekemeler qyzmetkerleri túrmelerdiń shamadan tys tolyp ketýi men qyzmetkerler tapshylyǵyna qarsy narazylyq aktsııalaryn bastady.
