Frantsııa prokýratýrasy Dýrovqa AQSh-qa barýǵa ruqsat bermedi
BRıÝSSELЬ. KAZINFORM – Frantsııa bıligi Telegram messendjeriniń negizin qalaýshy Pavel Dýrovtyń AQSh-qa ınvestıtsııalyq qorlarmen kelissóz júrgizýge barmaqshy bolyp, ruqsat suraǵan ótinishin qabyldamady. Bul týraly Politico basylymy habarlady, dep jazdy TASS.
Basylymnyń jazýynsha, Dýrov Frantsııa bıligi ruqsat etse ǵana elden shyǵa alady. Prokýratýra ókilderiniń málimetinshe, buǵan deıin ol 15 naýryz ben 7 sáýir aralyǵynda Dýbaıǵa barýǵa ruqsat alǵan.
Frantsııanyń barlaý qyzmeti Rýmynııadaǵy saılaýǵa yqpal etýdi ótingeni jalǵan
Buǵan deıin Dýrov Frantsııanyń Syrtqy barlaý bas basqarmasynyń jetekshisi Nıkolıa Lerner kóktemde Rýmynııadaǵy prezıdenttik saılaý aldynda konservatıvtik kózqarastaǵy rýmyn arnalarynyń únin óshirýdi suraǵanyn, alaıda bul ótinish oryndalmaǵanyn aıtylǵan. Al Frantsııanyń barlaý qyzmeti bul málimetti joqqa shyǵardy.
2023 jyldyń 24 tamyzynda Dýrov Parıjdegi Le-Býrje áýejaıynda birneshe aıyppen ustaldy. Atap aıtqanda, ol qylmystyq top quramynda zańsyz qarjylyq operatsııalar jasaýǵa múmkindik bergen onlaın platforma ákimshiligine qatysy bar degen kúdikke ilingen. Parıj prokýratýrasynyń málimdeýinshe, mundaı quqyqbuzýshylyq úshin 10 jylǵa deıin bas bostandyǵynan aıyrý jáne €500 myń aıyppul kózdelgen.
Tergeý sýdıasynyń sheshimimen kásipkerge sot baqylaýy taǵaıyndalyp, €5 mln kepil engizý mindetteldi. Sonymen qatar, ol apta saıyn eki ret polıtsııa bólimshesine baryp turýǵa jáne Frantsııa aýmaǵynan shyǵýǵa tyıym salynǵan.
Naýryz aıynyń sońynda Dýrovqa ýaqytsha Frantsııadan shyǵýǵa ruqsat berilip, ol Dýbaıǵa ushyp ketken. Sot baqylaýyna sáıkes, 7 sáýirde Frantsııaǵa oralýy tıis bolǵan. Parıj prokýratýrasy TASS agenttigine Dýrovtyń sot baqylaý sharttaryn buzǵany jóninde esh habar túspegenin, biraq onyń qazirgi ýaqytta Frantsııada ekeni naqty belgisiz ekenin málimdedi.
Eske sala keteıik, buǵan deıin Pavel Dýrov Telegram Eýropalyq Odaq zańyn buzdy degen aıyppen kelispeıtinin, ádiletsizdik ekenin jazǵan edi.